Mga modernong PUV, inilunsad sa Cagayan de Oro

Angelo Andrade, ABS-CBN News

Posted at Dec 10 2019 11:44 PM

CAGAYAN DE ORO CITY - Inilunsad nitong Martes ng Oro Transport Service Cooperative (OROTSCO) ang 15 modernong Public Utility Vehicles (PUVs) sa Cagayan de Oro City.

Lima sa mga ito ay airconditioned habang 10 ang non-aircon na bibiyahe sa ruta mula Barangay Bugo hanggang Opol sa Misamis Oriental.

Kumpara sa ordinaryong jeep, ipinagmamalaki ng OROTSCO ang ilang modernong kagamitan sa PUV gaya ng wifi, CCTV, tracking system at ang Beep card machine para card na lang ang gamitin ng mga pasahero kung magbabayad.

May 23-seating capacity ito at hanggang 8 pasahero ang papayagan nilang tumayo sa gitna.

Inilabas na rin ng LTFRB ang taripa para sa ruta na dadaanan ng mga modernong PUV.

Mula sa P7, magiging P9 ang pamasahe sa unang apat na kilometro habang P1.70 ang succeeding meter sa airconditioned at P1.40 naman sa non-aircon.

Ang OROTSCO ang kauna-unahang kooperatiba sa Cagayan de Oro na nakapaglunsad sa modernong PUV bilang tugon sa PUV modernization program ng gobyerno.

Naghahanap na sila ngayon ng 40 driver at passenger assistant officer na arawan ang sweldo at meron pang mga benepisyo.

Target ng OROTSCO na makapagsimula ng biyahe ang mga modernong PUV sa Disyembre 15.

Bisitahin ang Patrol.PH para sa iba pang mga balita.