Money laundering report sa yaman ni Revilla, binalewala ng Sandiganbayan?

ABS-CBN News

Posted at Dec 10 2018 09:08 PM | Updated as of Dec 11 2018 03:27 PM

Watch more in iWant or TFC.tv

Tinatayang nasa P87 milyon ang pumasok sa mga bank account nina dating senador Ramon "Bong" Revilla at ng kaniyang pamilya mula 2006 hanggang 2010, ayon sa ulat ng Anti-Money Laundering Council (AMLC). 

Ang mga petsa ng pagdeposito ay nasa 30 araw mula sa mga petsang inilista ng whisteblower na si Benhur Luy sa kaniyang ledger kung kailan ibinigay niya umano ang mga "kickback" ni Revilla sa "pork barrel scam" sa staff ng dating senador na si Richard Cambe.

Ayon pa sa ulat, walang idineklara si Revilla sa kaniyang Statement of Assets, Liabilities and Net Worth (SALN) na cash o ibang bank accounts na pagkukuhanan ng pera sa mga taong iyon.

Isa ang ulat ng AMLC sa mga ebidensiyang ipinresenta ng prosekusyon laban kay Revilla, na inabsuwelto ng Sandiganbayan noong Biyernes sa kasong plunder.

Inakusahan si Revilla ng plunder dahil sa pagbulsa umano ng P224 milyon sa kaniyang Priority Development Assistant Fund (PDAF) o "pork barrel" mula 2006 hanggang 2010.

Kinulimbat umano ni Revilla ang PDAF sa pamamagitan ng pagdaan ng mga ito sa mga "bogus" non-government organizations (NGO) ni Janet Lim Napoles.

Ayon sa dissenting opinion ni Sandiganbayan Justice Efren Dela Cruz, malakas na katibayan ang ulat ng AMLC na nakinabang si Revilla sa sariling PDAF, lalo at isa sa mga nabanggit na kompanya ni Revilla na nakatanggap ng halos P28 milyon ay wala namang operasyon noong mga panahong iyon.

Nagtataka ang dating tagapagsalita ng Korte Suprema na si Theodore Te kung bakit hindi ito binigyan ng halaga ng majority opinyon sa pagdedesisyon sa kaso laban kay Revilla.

"It's hard for me to understand why the court would not accept that," sabi ni Te.

"That would have triggered the court to say, 'Okay, this is a red flag.' There is an AMLC certification. There is a testimony, there is something that says this part of the money went to his bank account," ani Te.

[Dapat itong nagtulak sa korte para magsabi na ito ay 'red flag.' Mayroong sertipikasyon ng AMLC. Mayroong testimonya. Mayroong nagsasabi na ang bahagi ng pera ay napunta sa kaniyang bank account.] 

Ayon sa majority opinion, hindi napatunayan na galing kay Revilla o kay Napoles at Cambe ang perang naideposito sa mga bank account.

Nanindigan naman ang abogado ni Revilla na hindi tugma ang halaga ng pera sa listahan ni Luy at sa mga pumasok sa bank accounts.

"The AMLC should have gone beyond simply summarizing the deposits. They should have actually investigated the origin of these deposits," sabi ni Atty. Ramon Esguerra.

"Dapat itinahi o tahi-tahi 'yong circumstantial evidence na 'yon," dagdag ni Esguerra.

Ayon pa kay Esguerra, hindi obligasyon ni Revilla na ipaliwanag kung saan galing ang pera at hindi rin naman ito tinanong habang nililitis ang kaso.

Ayon naman sa isang complainant na si Levito Baligod, hindi nagtugma ang mga numero sa Ledger ni Luy at AMLC report dahil nakatanggap umano ng komisyon si Cambe.

"Both records involve thousands of characters and it will be too much of a coincidence for thousands of figures matching. Sinabi naman ng mga witnesses na Atty. Cambe also had a percentage from the commission," sabi ni Baligod. --May ulat ni Mike Navallo, ABS-CBN News

Bisitahin ang Patrol.PH para sa iba pang mga balita.