PatrolPH

Mga camera gagamitin sa paghuli ng traffic violators sa Maynila

ABS-CBN News

Posted at Dec 07 2020 03:41 PM

Mga camera gagamitin sa paghuli ng traffic violators sa Maynila 1
Pedicab driver sa labas ng Manila City Hall noong Marso 23, 2020. Fernando G. Sepe Jr., ABS-CBN News/File

MAYNILA — Inilunsad ngayong Lunes ang no-contact apprehension bilang paraan ng paghuli ng mga traffic violator sa mga pangunahing kalsada sa lungsod ng Maynila.

Pinangunahan ni Manila Mayor Isko Moreno ang paglulunsad ng no-contact apprehension program sa kanto ng Quirino at Taft Avenue sa Malate district.

Nasa 36 bagong HD camera ang in-install sa mga major thoroughfare sa lungsod. Kukuhanan ng mga ito ng mga video at retrato ang traffic violator bilang ebidensiya.

Ayon kay Moreno, wala nang lusot ang mga lalabag sa batas trapiko dahil 24/7 gumagana ang mga camera at binabantayan ng mga tauhan ng Manila Traffic and Parking Bureau (MTPB) sa command center.

Ia-assess ng MTPB ang video at makikipag-ugnayan umano sa Land Transportation Office para ma-trace ang may-ari ng sasakyan.

Magpapadala naman ang MTPB ng Notice of Violation (NOV) sa loob nang dalawang linggo. Ang mga motoristang gustong i-contest ang kanilang violation ay maaari namang makipag-ugnayan sa Manila Traffic Adjudication Board (MTAB).

Sa bagong programa, maiiwasan din umano ang pag-uusap ng motorista at enforcer na nagiging dahilan ng kotongan at kurapsiyon, bukod pa sa pag-iwas sa physical contact dahil sa COVID-19.

Ayon kay Moreno, nagiging hamon para sa 1,000 tauhan ng MTPB ang pagmando sa trapiko lalo't nasa kalahating milyong motorista ang dumadaan sa lungsod kada araw.

-- Ulat ni Jerome Lantin, ABS-CBN News

Bisitahin ang Patrol.PH para sa iba pang mga balita.