Imam patay sa pamamaril sa Baguio

Michelle Soriano, ABS-CBN News

Posted at Dec 06 2018 06:35 PM | Updated as of Dec 06 2018 07:45 PM

BAGUIO CITY - Patay ang isang imam matapos pagbabarilin sa business district sa lungsod nitong Huwebes ng umaga.

Nakuhanan ng CCTV ang pamamaril kay Imam Bedejim Abdullah ng isang lalaking naka-jacket.

Sa isa pang CCTV, kita ang pagtakbo ng gunman papunta sa main road na hinabol pa ng mga residente doon.

“Nakita namin yung gunman. Naglakad dito. Hinabol namin hanggang sa baba sa maharlika. Doon pumasok na sa maharlika sa may underground. Tapos yung damit niya tinatanggal niya,” kwento ng isang driver na nakakita sa pangyayari.

Watch more in iWant or TFC.tv

Umabot hanggang sa Maharlika Livelihood Center ang habulan kung saan aksidente namang nabaril ng gunman ang isang saleslady sa binti.

Nagpapagaling pa sa ospital ang babae.

“Pagdating sa Maharlika, binitawan yung baril niya, pumutok. May nadamay na isang babae doon,” ayon kay SPO3 Jonathan Cawala ng Baguio City Police.

Anim na basyo ng bala at dalawang slug ang narekober sa crime scene.

Wala pang matukoy na motibo sa likod ng pamamaril.

Nagluluksa ang Muslim community sa pagkawala ng 55-anyos nilang imam.

Nakatakda ng ilibing sa Bulacan ang biktima.
 

Bisitahin ang Patrol.PH para sa iba pang mga balita.