Bakit bawal magbitbit ng malaking halaga ng pera sa biyahe?

ABS-CBN News

Posted at Dec 05 2018 04:50 PM

Watch more in iWant or TFC.tv

Hinuli ang isang Koreano noong Sabado sa Ninoy Aquino International Airport nang makita ang 4 milyong Hong Kong dollars sa kaniyang maleta. Ayon sa Korean, galing umano ito sa mga nakuha niya sa casino. 

Nahaharap ito ngayon sa kasong unlawful importation of foreign currency at paglabag sa patakaran ng Bangko Sentral ng Pilipinas laban sa pagdadala ng mga pasahero ng foreign currency na higit sa US$10,000.

Bakit nga ba dapat ideklara sa mga paliparan kung magdadala ng malaking halaga sa biyahe? 

Paliwanag ni Atty. Claire Castro, ginagawa ito para maiwasan ang money laundering, o ang "paglilinis" ng pera na galing umano sa ilegal na transaksiyon, batay sa Republic Act 9160. 

"Kung nakuha ito sa isang corrupt na opisyal at dinala sa ibang bansa, (kung galing sa) drugs, o unlawful transactions sa bansa, iyon ang mino-monitor," ani Castro sa "Usapang de Campanilla" ng DZMM nitong Martes. 

Ayon kay Castro, dapat ideklara ng pasahero sa desk ng Bureau of Customs kung maglalabas ng higit US$10,000 sa bansa ang pasahero bago ang kaniyang flight. Dito siya magpapaliwanag kung ano ang pinanggagalingan ng malaking halaga at bakit siya maglalabas ng naturang pera mula sa bansa. 

Sa kaso ng Koreano, ayon kay Castro, dapat mapatunayan nitong "malinis" ang kaniyang pagsusugal tulad ng sa mga casino, na aprubado ng gobyerno, at hindi ito galing sa jueteng. 

Para kay Castro posibleng maabsuwelto ang Korean kung mapapatunayan na legal ang pagpapalit niya ng kaniyang salapi sa Hong Kong dollars. 

"Kung mate-trace back natin na galing ito sa casino ta's na-equivalent siya sa HK dollars, maaari siyang di kasuhan kasi valid ang transaction niya." ani Castro. 

Maaaring parusahan ng pito hanggang 14 taong pagkakakulong ang mga mapapatunayang nagsagawa ng money laundering.

Bisitahin ang Patrol.PH para sa iba pang mga balita.