Higit 800 kilo ng undocumented frozen meat kinumpiska sa Bacoor

Anjo Bagaoisan, ABS-CBN News

Posted at Dec 04 2020 10:59 AM

Watch more on iWantTFC

MAYNILA - Kinumpiska ang tinatayang 860 kilo ng undocumented frozen meat sa Bacoor City, Cavite nitong Miyerkules.

Nakasakay sa isang reefer van ang kahon-kahon na mga frozen na baboy at beef na dumaan sa inspeksyon ng mga tauhan ng National Meat Inspection Service (NMIS) Region 4A at ng Bacoor City Veterinary Service Office - Meat Inspection Team.

Nagsasagawa noon ang grupo ng routine inspection ng madaling-araw sa Aguinaldo Highway.

Ayon kay Bacoor City meat inspector James San Gabriel, hindi nadeklara sa dalang certificate of meat inspection ng van ang 35 sa 40 mga kahon. 

May ilan sa mga karne na ni-rebox pero hindi nalagyan ng sticker ng NMIS.

Bukod pa rito, wala ring accreditation sa NMIS ang mismong reefer van.

Galing din sa Bacoor ang karne at ihahatid dapat sa Tanza, Cavite nang patigilin ng mga nag-iinspeksyon.

Idinaan sa cold storage verification ang mga karne at ipinabaon ang mga nakitang mishandled at pabulok na.

Noong isang linggo naman, nagkumpiska ng meat inspectors ang 300 kilo ng bagong-katay na manok dahil hindi rin rehistrado ang source nito.

Babala ni San Gabriel, posibleng dumami ang mga ganitong kaso dahil sa lalaking demand para sa karne sa Kapaskuhan.

Paalala nila sa publiko, posibleng apektado ang kalidad at kaligtasan ng karne na hindi rehistrado ang pinagmulan o dumaan sa tamang inspeksyon.