PatrolPH

Halalan 2022: Bong Go, umatras na sa presidential race

ABS-CBN News

Posted at Nov 30 2021 11:33 AM | Updated as of Nov 30 2021 06:46 PM

Bong Go pagkatapos ng kaniyang paghain ng kandidatura sa pagkapangulo sa Comelec headquarters sa Maynila. Itinataas ni Pangulong Rodrigo Duterte ang kaniyang kamay. George Calvelo, ABS-CBN News
Bong Go pagkatapos ng kaniyang paghain ng kandidatura sa pagkapangulo sa Comelec headquarters sa Maynila. Itinataas ni Pangulong Rodrigo Duterte ang kaniyang kamay. George Calvelo, ABS-CBN News

MAYNILA (2ND UPDATE) — Sinabi ni Sen. Christopher "Bong Go" na aatras siya sa presidential race, anunsiyo niya nitong Martes dahil ayaw umano niyang makadagdag sa problema ni Pangulong Rodrigo Duterte. 

"Ayaw din talaga ng aking pamilya kaya naisip ko na siguro ay hindi ko pa po panahon sa ngayon. Diyos lang po ang nakakaalam kung kelan talaga ang tamang panahon. Ayoko rin pong lalong maipit si Pangulong [Rodrigo] Duterte, higit pa po sa tatay ang pagmamahal ko sa kanya," ani Go, na isang administration-backed candidate. 

Watch more on iWantTFC

"In the past few days I realized that my heart and my mind are contradicting my action. Talagang nagre-resist po ang aking katawan, puso at isipan... Sa ngayon po iyon po ang mga rason ko, that is why I am withdrawing from the race," dagdag niya. 
 

Watch more on iWantTFC

Unang naghain ng kandidatura sa pagkabise-presidente si Go, na ka-tandem si Sen. Ronald "Bato" Dela Rosa sa campaign slate ng PDP-Laban. 

At noong Nobyembre 13, kinumpirmang tatakbo siya sa pagkapangulo sa bisa ng substitution, at aatras si Dela Rosa sa presidential race. 

Noon din nagkaroon ng usapin na si Duterte ang tatakbong Bise Presidente ni Go pero napagdesisyunan na tatakbo itong senador, sa bisa ng substitution. 

Hindi naman nagbigay ng iba pang detalye si Go pero tatakbong Bise Presidente ang anak ni Duterte na si Davao City Mayor Sara Duterte-Carpio, na ka-tandem si dating Sen. Ferdinand "Bongbong" Marcos Jr. Hindi rin niya kinumpirma kung ang desisiyon niya ay dahil dito. 

Samantala, kinumpirma ng Commission on Elections na hindi tatanggap ngayong araw ng withdrawal ng certificate of candidacy dahil holiday at walang skeletal workforce. 

Sa Comelec rules, personal dapat na gawin ng aspirant ang paghahain ng pag-atras. 

Samantala, umaasa pa rin ang ilang miyembro ng PDP-Laban na magbabago pa ang isip ni Go sa pag-atras nito at ipagpapatuloy pa ang mga programang inumpisahan ni Duterte. 

Bago nito, ilang ulit nang sinabi ni Go na nagdadalawang-isip siya kung ipagpapatuloy ang kaniyang pagtakbo. 

Giit ng senador, wala siyang ambisyon na maging pangulo ng bansa at handa na rin aniya niyang suportahan kung sino ang ieendorso ni Duterte, 

Nirerespeto naman ni Energy Secretary Alfonso Cusi, presidente ng PDP-Laban Cusi Wing, ang desisyon ni Go. 
 

Magpapatawag aniya siya ng pulong sa Miyerkoles para pag-usapan ang magiging hakbang ng partido sa darating na halalan. 

"Ang partido po ay itinutulak 'yung program of gov't na sinimulan ni Pangulong Duterte at 'yun po ay patuloy naming isusulong dun sa mga kandidato namin sa senators, congressmen at other local candidates," ani Cusi. 
 

Hindi naman nagbigay ng komento si Cusi kung kahulugan ba nito ay susuportahan nila si Sen. Manny Pacquiao na nasa kabilang paksyon ng partido para sa halalan. 

Ayon kay Aksyon Demokratiko standard-bearer Mayor Isko Moreno Domagoso, handa siyang tanggapin ang suporta ng administrasyon oras na piliin siyang iendorso ni Duterte. 

"Thank you, thank you in advance. Hindi ako tatanggi. Ang pulubi di nakakapamili. Kailangan ko ng lahat ng klaseng tulong, ordinaryong tao, kahit sinong tao. Kasi mabigat na laban to, malaki ang Pilipinas," ani Moreno. 

Wala namang planong ligawan o kausapin ng kampo ni Sen. Ping Lacson ang administrasyon para makuha ang suporta ng pangulo. 

"An endorsement is endorsement. No matter kung ano ang kine-carry ng endorsement, it’s still an endorsement. Doon na lang muna tayo pero mahirap sagutin kung open, willing or will seek. But definitely we will not seek endorsement dahil masyadong presumptuous," ani Lacson, na tatakbo sa ilalim ng Partido Reporma Party. 

Ikinatuwa naman ni Leody De Guzman ang pag-atras ni Go at sinabing tama lang umano na huwag nang ibalik ang panunungkulan ni Duterte sa Malacañang. 

"Siguro, maganda ‘yun. Dapat talaga huwag nang magtangka ang mga Duterte na pumuwesto pa sa mataas na posisyon ng ating pamahalaan dahil masama talaga ang karanasan natin sa halos 5 taong panunungkulan ni Duterte lahat halos nalabag, lahat ng karapatan na maghayag tulad ngayon, ‘yung karapatan na mabuhay ay nalalabag," ani De Guzman. 

— May mga ulat ni Pia Gutierrez, ABS-CBN News

Bisitahin ang Patrol.PH para sa iba pang mga balita.