Aileen Lizada itinalagang commissioner ng CSC

ABS-CBN News

Posted at Nov 29 2018 04:30 PM

Bagong CSC commissioner Aileen Lizada. Jonathan Cellona, ABS-CBN News

Itinalaga bilang commissioner ng Civil Service Commission (CSC) si dating Land Transportation Franchising and Regulatory Board member Aileen Lizada.

Sa appointment paper na inilabas ng Malacañang nitong Huwebes, idineklara na si Lizada ang ad interim commissioner ng CSC. Magtatagal ang kaniyang termino hanggang Pebrero 2, 2025. 

Si Lizada ang papalit kay dating commissioner Robert Martinez. 

Naging spokesperson ng LTFRB si Lizada bago magbitiw nitong 2018. Bagama't bumitiw sa pagiging spokesperson, nagsilbi pa ring board member si Lizada hanggang sa malipat sa CSC. 

Nitong nakaraang linggo lamang, inakusahan si Lizada ng pagkakalat umano ng mali at malisyosong impormasyon ukol sa kabubukas pa lang na Parañaque Integrated Terminal Exchange (PITX).  

Tinutulan din ni Lizada ang P2 dagdag sa minimum fare ng pampasaherong jeep. 

Itinalaga naman ni Duterte sina Ruth Marie Equipaje at Cesar Aljama sa Nayong Pilipino Board of Trustees, ilang buwan matapos niya sibakin ang lahat ng miyembro ng nasabing board dahil sa maanomalya umanong pagpapaupa sa lupa ng gobyerno. 

Itinakda niya namang undersecretary ng Department of Agriculture si Waldo Carpio, bayaw ni Davao City Mayor Sara Duterte. 

Bisitahin ang Patrol.PH para sa iba pang mga balita.