PatrolPH

Lalaki patay, 3 sugatan sa umano'y pamamaril ng sundalo sa Iloilo

ABS-CBN News

Posted at Nov 27 2022 11:36 AM

Patay ang isang lalaki habang sugatan ang tatlong iba pa matapos umanong mamaril ang isang sundalo sa Passi City, Iloilo nitong Sabado.

Kinilala ang nasawi bilang si Greg Palomaria Sr., 54 taong gulang at residente ng Barangay Aglalana kung saan nangyari ang insidente.

Nasugatan naman sina Greg Palomaria Jr., 22; Mark Palomaria, 30; at isang 17 taong gulang na lalaki.

Ayon sa testigo, bago ang pamamaril ay hinarang umano ng suspek at kapatid nito at tinangkang hampasin ng bakal si Greg Jr., na dumaan sa harap ng kanilang bahay sakay ng isang motorsiklo.

Makalipas ang ilang minuto'y bumalik si Greg Jr. kasama ang ilang kamag-anak para kumprontahin ang magkapatid.

Nagkaroon ng gulo sa lugar hanggang sa namaril na ang isa sa kanila, na miyembro ng Philippine Army.

Agad dinala ng mga residente sa ospital ang mga biktima pero idineklarang dead on arrival si Greg Sr. dahil sa tinamong tama ng bala sa katawan.

Ligtas at patuloy namang ginagamot ang mga nasugatan.

Ayon sa Passi police, dati nang may alitan ang dalawang panig matapos umano bugbugin ng pamilya Palomaria ang isa sa mga suspek noong Oktubre.

Agad nahuli ng pulisya ang magkapatid na suspek at pinoproseso ang mga kasong maaaring maisampa laban sa kanila.

Hustisya ang panawagan ng pamilya ng mga biktima sa nangyaring insidente.

— Ulat ni Rolen Escaniel

 FROM THE ARCHIVES

Watch more News on iWantTFC
Bisitahin ang Patrol.PH para sa iba pang mga balita.