Lalaking inagawan ng mic sa videoke, nagwala

ABS-CBN News

Posted at Nov 27 2017 09:19 AM

MANILA - Dinampot ang isang lalaking nagwala at nagbasag umano ng mga bote ng beer matapos agawan ng mikropono sa isang videoke bar sa Quezon City, Linggo.

Kuwento ni Emillio Culambo, 26, kumakanta siya ng "Kasalanan" nang bigla siyang agawan ng mic at suntukin ng isang lalaki sa Blue Grey Kitchenette sa Kamias Road. Pero tumakbo lang aniya siya at hindi siya ang nagwala sa bar.

"Binigay ko na [ang mic], sa 'yo na iyan. Bigla akong sinapak. Pagsapak sa akin, tumakbo na ako. Eh ang laki-laking tao nun. Kaya ko ba yun?" sabi ni Culambo.

"Wala akong kasalanan d'yan. Hindi ako nagbasag talaga."

Pero ayon sa empleyado ng bar na si Rodel Silvino, si Culambo ang unang nagbasag ng bote at nakasugat sa kanya.

"Nasa loob ako ng kusina, pinagluluto ko sila ng pulutan. Paglabas ko, nagbabasag na sila ng bote. Binasag niya yung isang bote... tinamaan ako," ani Silvino.

"Yung kainuman niya, nagbato ng bato. Tinamaan niya yung salamin namin. Yung 2 pinto namin nabasag," dagdag niya.

Nanawagan naman si Culambo sa kanyang mga kasamahan na sabihin ang totoo. Aniya, "Bakit ako lang idinidiin nila? Wala ba ito? Wala bang hustisya ito?"

Tinitingnan pa ng pulisya kung ipauubaya na lang sa barangay ang kaso at kung makakalaya rin si Culambo.

- Ulat ni Kristine Sabillo, ABS-CBN News

Bisitahin ang Patrol.PH para sa iba pang mga balita.