Jeep na may mga 'sabit,' motoristang may pekeng lisensiya huli sa Rizal

Nahuli ng Inter-Agency Council for Traffic (I-ACT) ang apat na pampublikong sasakyan na lumalabag umano sa 70 porsiyentong seating capacity sa Taytay, Rizal.

Kabilang sa mga natiketan nitong Miyerkoles ang isang jeep na natiyempuhang may mga nakasabit pang pasahero.

Ayon sa I-ACT enforcers, biglang pinapasok ang mga nakasabit na pasahero sa loob ng jeep bago umabot sa Manila East Road, kung saan sila nagsasagawa ng operasyon.

Umabot sa 82 motorista ang natiketan ng mga enforcer, kalahati sa mga ito sa unang 20 minuto ng operasyon.

4 PUVs plying the Manila East Road in Taytay, Rizal were issued tickets for overloading violations. This jeep was caught with passengers hanging onto handles at the back

📸:i-ACT pic.twitter.com/KavByXXoId

— Anjo Bagaoisan (@anjo_bagaoisan) November 25, 2021

Nahuli rin ang isang motorcycle rider na hindi nakasuot nang tamang helmet.

Nang hingan ng lisensiya, natuklasang peke pala ang ipinakita ng rider.

Dahil ilang beses na ring nakakahuli ang i-ACT ng mga motoristang may pekeng lisensya, nagpaalala sila sa publiko na iwasan ang mga nag-aalok ng tulong para makakuha ng lisensya online dahil posibleng peke lang din ang maibigay nito sa mahal pang halaga.

RELATED VIDEO