PatrolPH

2 high school sa Imus binuksan bilang pediatric vaccination site

Anjo Bagaoisan, ABS-CBN News

Posted at Nov 25 2021 07:41 AM

Watch more on iWantTFC

MAYNILA—Tuloy-tuloy na ang pagbabakuna sa mga kabataan edad 12 hanggang 17 sa lungsod ng Imus, Cavite sa paggamit ng 2 nitong high school bilang vaccination site.

Sinimulan ang pagbabakuna sa Imus National High School at General Emilio Aguinaldo National High School noong Lunes.

Ayon kay Mayor Manny Maliksi, target ng lungsod na maturukan ng bakuna ang 1,000 hanggang 1,200 kabataan sa bawat site kada araw.

Pero sa ngayon hindi pa umaabot ng 900 ang average na nababakunahan kada araw sa isang site.

Sabi ng pamahalaang lungsod, ginamit na ang mga paaralan para mas mapabilis ang pagpapabakuna sa mga bata lalo’t may record na ang mga mag-aaral dito at mas madali itong mapuntahan.

Tumutulong din sa pagbabakuna ang mga guro at non-teaching staff ng mga paaralan.

May pinagsamang populasyon ang 2 paaralan na 21,000 mag-aaral.

Tanging mga kabataang bahagi ng rest of the population ang mababakunahan lang sa mga high school vaccination site.

Sa ospital pa rin babakunahan ang mga kabataang may comorbidities o pediatric A3 category.

Para magparehistro sa vaccination, bisitahin ang website na dvas.dict.gov.ph/registration. 

Bisitahin ang Patrol.PH para sa iba pang mga balita.