PatrolPH

'Academic break for a cause', isinagawa ng law school sa Tarlac para sa mga binagyo sa Cagayan Valley

Anjo Bagaoisan, ABS-CBN News

Posted at Nov 25 2020 07:18 AM

Watch more on iWantTFC

MAYNILA - Imbes na magbakasyon nang suspendihin ang mga online class, nagtulungan ang mga estudyante ng isang law school sa Tarlac para makapag-ambag ng relief goods sa mga nasalanta ng Bagyong Ulysses sa Cagayan Valley.

Isang linggong nagsagawa ng "academic break for a cause" ang Tarlac State University - School of Law (TSU-SOL) mula November 17 hanggang 21.

Bunsod ito ng panawagan ng maraming estudyante na mag-academic break dahil sa naging kawalan o paghina ng internet connection at power interruption kasunod ng mga bagyo.

Ayon kay (TSU-SOL) Dean Peng dela Rama, inengganyo nila ang mga law student na samantalahin ang walang pasok para sumama sa donation drive at mag-empake ng relief goods sa gym ng pamantasan.

Nakapag-repack sila ng halos 2,000 bag ng bigas, tinapay, de lata, gamot, toiletries at mineral water.

Dalawang bugsong nagpadala ng relief goods sa Sta. Maria at Ilagan sa Isabela pati sa Tuguegarao City sa Cagayan.

Tumulong sa paghatid ng mga ito ang mga sundalo ng Philippine Army at Philippine Air Force.

Sabi ni dela Rama, naging makabuluhan ang pansamantalang pagtigil ng klase para sa mga estudyante dahil nakatulong sa mga nas nangangailangan.

Bisitahin ang Patrol.PH para sa iba pang mga balita.