Mga magsasaka, mangingisda humihingi ng ayuda sa DA matapos mabagyo

ABS-CBN News

Posted at Nov 20 2020 06:08 PM

Kabilang sa hiniling ng mga magsasaka ang cash aid, lalo na sa mga direktang naapektuhan ng kalamidad bunsod ng bagyong Quinta, Rolly, at Ulysses. Screengrab

MAYNILA — Nagtipon-tipon ang ilang grupo ng magsasaka at mangingisda sa tanggapan ng Department of Agriculture (DA) upang humirit ng ayuda matapos silang salantain ng mga nagdaang bagyo sa bansa. 

Pasado alas-10 ng umaga nang sumugod sa DA office sa Quezon City ang miyembro ng iba't ibang farmer, fisher, at peasant groups para makiusap na bigyan sila ng alalay makalipas ang 3 malalakas na bagyo. 

Kabilang sa hiniling nila ang cash aid, lalo na sa mga direktang naapekuhan ng kalamidad bunsod ng bagyong Quinta, Rolly, at Ulysses.

Hiling din nila na maalis na ang taripa at mga excise tax na dagdag pabigat sa kanila at sa taumbayan.

Kinokondena rin nila ang pagmimina at pagsisira sa kalikasan na pinaniniwalaang dahilan ng mga sakuna.
 
"Nananawagan kami, sana huwag ninyong kunin ang mga minerals, at sirain ang kalikasan dahil 'yan ang dahilan ng sakuna," ani Fernando Hicap, chairperson ng Pamalakaya. 

Sabi naman ng Kilusang Magbubukid ng Pilipinas (KMP), sa ngayon dapat ay hindi na rin nag-i-import ng bigas para kumita naman ang local farmers.

"Kawawa ang mga magsasaka dapat hindi na mag-import ng bigas at dapat sariling atin ang kalakal," ani Danilo Ramos, chairperson ng KMP. 


—Mula sa ulat ni Zyann Ambrosio, ABS-CBN News

Watch more in iWantTFC
Bisitahin ang Patrol.PH para sa iba pang mga balita.