2021 budget ng Film Development Council of the Philippines, hindi muna ipinasa ng Senado

Robert Mano, ABS-CBN News

Posted at Nov 19 2020 09:34 PM | Updated as of Nov 20 2020 05:15 AM

MANILA - Hindi muna inaprubahan ngayong Huwebes ng Senado ang panukalang budget ng Film Development Council of the Philippines (FDCP) para sa susunod na taon.

May mga tanong pa kasi ang mga senador na nais nilang masagot muna ng mga opisyal ng FDCP.

Sa budget deliberation, kinuwestyon ni Senate President Vicente Sotto III ang poder ng FDCP kung bakit ito nagpalabas ng panuntunan at may joint administrative order pa sa Department of Health at Department of Labor and Employment para sa safety protocols sa film at audio visual production shoots.

Giit ni Sotto, walang kapangyarihan ang FDCP sa film production at TV production.

"What is the legal basis for overexercising their authority over the entire television sector?" ani Sotto.

"Since when did television and advertising production became under the scope of the jurisdiction of FDCP? Never," dagdag ni Sotto, na siyang may akda ng batas na bumuo sa FDCP.

Marami aniyang film, TV producers, at advertisers ang nagrereklamo sa utos ng FDCP, lalo na ang pagpapaalam dapat dito para sa mga shoot pitong araw bago ang actual shoot.

Bakit hindi na lang aniya hayaan ang mga producer na sundin ang panuntunan ng Department of Health.

Tanong rin ni Sen. Joel Villanueva, kakayanin ba ng FDCP na i-monitor ang lahat ng production, may sapat iba tong manpower para gawin ito, at ano ang kapangyarihan ng FDCP para gawin ito?

"Common state dictates that they should report to the Department of Labor. Hindi 'yung nangyayari ngayon because it could be abused," sagot ni Sotto.

Inihalimbawa ni Sotto ang isang shoot sa Pampanga na pinahinto raw dahil walang permit mula FDCP. Hindi aniya ito requirement, at dapat DOH ang sinusunod.
 
Kinuwestyon rin ni Sotto ang pag-revise ng FDCP sa kanilang implementing rules and regulations, kung saan mas pinalakas ang council na hindi naman itinakda ng mismong batas o Republic Act 9167 na bumuo ng FDCP.

Kasama sa mga idinagdag ng FDCP na kapangyarihan nito ay ang pagtatalaga ng pamantayan para sa pagpapalabas ng mga pelikula sa bansa.

"Bakit gagawa ka ngayon ng bagong IRR at bibigyan mo ng bagong power yung Council... when the original IRR after 2002 was unquestioned," ani Sotto.

"The council cannot be superior to Congress," aniya.

Kinuwestiyon din ni Sotto kung bakit gumawa ang FDCP ng isang programa para makapagbigay ayuda sa mga "miyembro ng press" at mga "live performers."

"Why are the members of the press or live performers included in the program of a film development body? Ano kinalaman noon?" ani Sotto.

Si Sen. Grace Poe naman, pinaalalahanan ang pamunuan ng FDCP na hindi dapat pahirapan pa ang naghihirap nang sektor ng pelikula.

"The industry is going through a lot of challenges now," sabi ni Poe na anak ng umaong action star na si Fernando Poe Jr. at beteranang actress na si Susan Roces.

"We should not overburden the stakeholders of the industry with too many requirements at this point," aniya.

Watch more in iWantTFC

- ilang ulat mula kay Katrina Domingo, ABS-CBN News