Inakalang holdapan sa jeep sa Maynila, personal na alitan pala

ABS-CBN News

Posted at Nov 18 2019 05:50 PM | Updated as of Nov 18 2019 07:06 PM

Viral sa social media ang video ng isang lalaking nakasabit sa gilid ng jeep at nananakit ng pasahero. Inakala itong insidente ng holdap pero nilinaw ng mga awtoridad ng Maynila na personal na alitan lamang ito.

Nilinaw ngayong Lunes ni Manila Mayor Isko Moreno na personal na away, at hindi panghoholdap, ang nangyayari sa isang video na kumalat kamakailan sa social media.

Sa video, mapapanood ang isang lalaki nakasampa sa gilid ng isang umaandar na jeep sa may kanto ng United Nations Avenue at Taft Avenue. Kita rin sa video na sinasaktan ng lalaki ang isang pasahero.

Watch more in iWant or TFC.tv

Sa press conference, nilinaw ni Moreno, kasama ang Manila Police District, na hindi krimen ang insidenteng nakuhanan kundi umano ay pagresponde sa pambabastos sa babae.

"Maliwanag na hindi ito nakawan, snatching, o holdapping. Ito ay mga personal na alitan lamang," ani Moreno.

Kinilala ang lalaki sa video bilang si Jomar Alingod, na gumaganti lang umano sa taxi driver na tinangkang tumakas matapos hipuan ang kaibigan niyang babae.

Kalaunan ay pinatawad din ng babae ang taxi driver, ayon sa Manila police. -- Ulat ni Zyann Ambrosio, ABS-CBN News

Bisitahin ang Patrol.PH para sa iba pang mga balita.