Mga evacuee sa Calumpit, nangangailangan ng tulong

Anjo Bagaoisan, ABS-CBN News

Posted at Nov 17 2020 06:12 AM

Watch more in iWantTFC

MAYNILA - Posibleng tumagal nang hanggang 3 araw o higit pa ang pamamalagi ng mga evacuee sa F. Mendoza Memorial Elementary School sa Poblacion, Calumpit, Bulacan.

Dito lumikas ang nasa 200 pamilya mula sa Bgy. Sapang Bayan, na isa sa matitinding binaha dahil sa Bagyong Ulysses.

Abot ng dibdib at minsan lagpas-tao ang baha sa lugar na katabi ng ilog.

Pero tuloy pa rin sa pagtrabaho ang ilang residente na umakyat na lang sa 2nd floor ng kanilang mga bahay. 

Sa evacuation center, sumilong din ang ilang pamilya mula sa Poblacion, Sucol, at Calizon. 

Ayon sa barangay social worker na si Melody Ibera, mas marami pa sana ang nailikas dito pero hindi magagamit ang ilang mga kuwarto dahil pinaglagakan ng mga module para sa distance learning.

Ang ibang kuwartong wala namang laman ay nalubog sa baha kaya hindi rin magamit.

May baha rin sa ilang daanan sa loob ng evacuation center. 

Sapat naman ang distansya sa kwarto ng 2 hanggang 3 pamilya na nakikihati nito.

Nakikiigib sila sa ilang gripo sa paaralan at nangangailangan ng regular na suplay ng inuming tubig. 
 
Pero namomroblema ang ilan tulad ng 44-anyos na si Perlita Ramos dahil nasira na ang kanilang bahay ay kailangan pa niya ng pera para sa dialysis sa Malolos. 

"Yong pag-uwi po ngayon ang hirap kasi mabaho yung tubig tapos ang bahay namin bakbak ang bubong. Wala na kaming uuwian. Makikituloy na lang kami sa tiyahin, biyenan ko." 

Mahigit 4 na taon na siyang nagpapadialysis dahil sa hypertension at binuhat pa siya ng asawa para makalikas noong bagyo. 

Umaabot ng P6,000 ang gastos nito sa 2 beses kada linggo, pero P3,200 lang ang kita ng asawa niyang mason. 

Umasa na lang siya sa ambag ng ibang evacuees pero kulang pa rin ito. Inutang na nga nila ang gastos ng dialysis noong Sabado at kailangan ulit para bukas. 

"Minsan may mag-aabot sa akin kaya pasalamat na po na may ganun. Di naman nawawalan ng tumutulong kahit papano. Sa session gaya bukas 3 libo po, wala pa kaming hawak kahit singko. Kaya mahirap."

Ayon sa Municipal Social Welfare Department, nasa 1,349 families o 4980 tao ang sumisilong ngayon sa 31 evacuation center sa Calumpit. 

May ilan sa kanilang bumabalik ng mga bahay para maglinis o mag-ingat ng gamit, pero pangamba nila hangga't hindi pa tuluyang humuhupa ang baha dito muna sila mananatili. 

Marami sa kanila nangangailangan din ng tulong pinansyal dahil sa mga nasirang bubong.

Bisitahin ang Patrol.PH para sa iba pang mga balita.