COVID-19 isolation facility na gawa sa container vans, binuksan sa Las Piñas

Anjo Bagaoisan, ABS-CBN News

Posted at Nov 17 2020 05:59 AM

MAYNILA - Sa gitna ng responde sa epekto ng sunod-sunod na bagyo patuloy din ang pagbukas ng mga pasilidad sa pagsugpo sa COVID-19.

Dinagdagan ang isolation center ng mga suspected at kumpirmadong kaso ng COVID-19 sa Las Piñas City. 

Pinasinayaan nitong Lunes ang bagong isolation facility na tinawag na LIGTAS 3 sa dating bakanteng lote ng gusali sa Bgy. Almanza Dos. 

Itinayo ang pasilidad gamit ang 24 na 40-footer container vans na dinonate ng Department of Public Works and Highways. 

Ayon sa lokal na pamahalaan ng Las Piñas, may 99 na kuwarto ang pasilidad na nilagyan ng air conditioner, tig-isang kama, at palikuran. 

Nakalaan ang 96 na kuwarto para sa mga pasyente at ang natirang tatlo ay tutuluyan ng mga nars at isang ginawang X-ray room. 

Nauna nang nagpatayo ng dalawang Local Isolation and General Treatment Areas o LIGTAS sa mga converted na gusali sa Bgy. Daniel Fajardo at sa Bgy. Talon Uno. 

Nitong Nob. 16, may 96 active COVID-19 cases sa Las Pinas, sa kabuuang 4,896 na naging confirmed cases sa lungsod. Halos 200 naman o 195 ang namatay na sa sakit. 

Samantala, sa 20 barangay sa lungsod, dalawa ang walang kaso ngayon ng COVID-19, ang Ilaya at Talon Kuatro.

Bisitahin ang Patrol.PH para sa iba pang mga balita.