Lalaki nalunod sa kasagsagan ng bagyong Ulysses sa Isabela

ABS-CBN News

Posted at Nov 12 2020 10:02 PM

Patay ang isang lalaki dahil sa pagkalunod nang umapaw ang sapa sa bayan ng Jones, Isabela dulot ng bagyong Ulysses nitong Huwebes ng umaga.

Kinilala ang biktima na si Mark Angelo Atabug, 27-anyos na construction worker at residente ng Barangay Esperanza sa bayan ng Angadanan.

Sa imbestigasyon ng Jones Police, pansamantalang nanunuluyan ang biktima sa isang bunkhouse kasama ang iba pang trabahador ng mini dam sa Barangay Dicamay 1.

Inilikas sila ng mga opisyal ng barangay dahil sa umaapaw na tubig sa sapa malapit sa kanilang bunkhouse.

Pero sa hindi pa malaman na dahilan ay bumalik umano ang biktima doon at inabutan ng pagguho ng lupa sa bunkhouse.

Sa pag-aakalang makaliligtas ay tumalon umano ang biktima sa sapa, pero inanod siya hanggang malunod.

Natagpuan ang biktima na wala ng buhay sa bahagi ng sapa sa Sitio Dicaboguew. 

- Ulat ni Harris Julio

Watch more in iWantTFC
Abot hanggang bubong ang baha sa ilang bahay sa Barangay Mabini at Calao East sa Santiago City, Isabela. Umapaw ang ilog matapos ang pag-ulan dulot ng bagyong Ulysses. Inilikas ang mga apektadong residente. Video courtesy of Aiz Zingkit Ramos