PatrolPH

'Ang bilis ng pangyayari': Ilang taga-Rizal idinetalye ang paglikas, pagbahang dala ng Ulysses

ABS-CBN News

Posted at Nov 12 2020 06:23 PM | Updated as of Nov 12 2020 07:23 PM

'Ang bilis ng pangyayari': Ilang taga-Rizal idinetalye ang paglikas, pagbahang dala ng Ulysses 1
Gamit ang mga bangka, inilikas ang ilang residente sa Phase 1K-2 sa Kasiglahan Village. Adrian Ayalin, ABS-CBN News

MAYNILA - Itinuturing ng ilang residente na kasing lala o baka mas malala pa sa bagyong Ondoy ang pagtama ng bagyong Ulysses sa isang bahagi ng bayan ng Cainta, Rizal. 

Gabi hanggang madaling araw binuhusan ng ulan ang karamihan ng mga residente kung kailan tulog ang karamihan. 

Kasama sa mga inilikas ang mga residenteng na-trap sa ibabaw ng mga bubong at ika-2 palapag ng mga bahay sa Phase 1K2 sa Kasiglahan Village, barangay San Jose. Isa ang village sa mga naunang humingi ng tulong sa Teleradyo sa kasagsagan ng pananalasa ng bagyo. 

Watch more on iWantTFC

Marami sa Phase 1K-2 ang hindi nakalikas agad. 

"Kasi po kanina hindi pa gaanong ano po, kaya umakyat kami sa second floor, mabilis lumakas ang tubig. (Nasabihan ba kayo?) Opo pero yung mga anak at apo ko nasa school," ani Joy Romias, isa sa mga residente. 

Mula naman madaling araw hanggang umaga ng Huwebes tumungtong sa mga bubungan ang ilang residente sa Phsse 1D. 

Para sa residenteng si JR Navarro mabilis ang takbo ng mga pangyayari. 

"Noong una nagbigay ng warning sa baba na tumaas ang tubig, ang bilis ng pangyayari, umabot sa baywang agad," ani Navarro. 

Agad namang nagsalba ng mga gamit ang mga residente gaya ni Jose Quintos. 

Ngayon, tulong ang apela ng mga residente, hindi lang sa mga awtoridad kung hindi sa kanilang mga kaanak. 

"Sana po matulungan kami ilipat na kami sa hindi ganito para hindi namin mararanasan uli, ilang taon tas eto na naman, kesa sa mawalan ng buhay ang tao, ilagay natin sa maayos na tinitirahan," ani Lala Fevidal. 

"Sa ate ko Myra Cueva, Mary Ann Remoso, ate tulungan niyo kami, limas ang gamit namin ni wala kami makain, wala damit," ayon sa residenteng si Mary Jean Donasco. -- Ulat ni Adrian Ayalin, ABS-CBN News

Bisitahin ang Patrol.PH para sa iba pang mga balita.