PatrolPH

Bagong footbridge, EDSA bus station binuksan sa Buendia Makati

Anjo Bagaoisan, ABS-CBN News

Posted at Nov 11 2021 01:07 PM | Updated as of Nov 11 2021 03:59 PM

Maaari nang makasakay ang mga commuter ng bus sa EDSA Buendia sa Makati matapos buksan ang footbridge patawid sa istasyon ng EDSA bus carousel. Anjo Bagaoisan, ABS-CBN News
Maaari nang makasakay ang mga commuter ng bus sa EDSA Buendia sa Makati matapos buksan ang footbridge patawid sa istasyon ng EDSA bus carousel. Anjo Bagaoisan, ABS-CBN News

MAYNILA - Maaari nang makasakay ang mga commuter ng bus sa EDSA Buendia sa Makati.

Ito’y matapos buksan ng Metropolitan Manila Development Authority (MMDA) nitong Huwebes ang footbridge patawid sa istasyon ng EDSA bus carousel sa gitna ng highway.

Kalahati lang ang footbridge at hindi tumutulay sa magkabilang lane ng EDSA.

Maaakyat ito mula sa mga hagdanan sa bungad ng Makati Avenue sa southbound ng EDSA.

Sabi ni MMDA chairman Benhur Abaos, ika-125 na footbridge na ito na pinatayo ng ahensya.

Nakapagitan ang Buendia station sa mga istasyon sa Guadalupe at Ayala na nasa Makati rin.

Isa rin sa pinakadinadaanang intersection sa EDSA ang Buendia kaya nagpatayo ng dagdag na istasyon ng bus dito.

Magiging opsyon na rin ito ng masasakyan ng mga sumasakay sa MRT sa Buendia.

Unang plinanong idikit ang sakayan ng bus sa MRT station pero ipinuwesto na ito sa unahan at sa mas maluwag na lane para hindi makaabala sa trapiko.

Paraan na rin ang footbridge para hindi tumawid sa kalsada ang mga bababa o sasakay ng bus.

Tinataya ng MMDA na ginagamit ng 3 milyong katao ang mga footbridge nito.

Sabi ng MMDA, nagpapatayo pa sila ng mga dagdag na footbridge sa EDSA Tramo, Taft, at Roxas Boulevard sa Pasay bukod sa isa pang itinatayo ng DPWH.

Bisitahin ang Patrol.PH para sa iba pang mga balita.