Ulysses pinaghahandaan ng mga barangay sa Calamba na lubog pa rin sa baha

ABS-CBN News

Posted at Nov 11 2020 06:02 PM

Tatlong barangay sa Calamba, Laguna ang lubog pa rin sa baha, ilang linggo matapos manalasa doon ang bagyong Quinta at Rolly. Bianca Dava, ABS-CBN News

Lubog pa rin sa baha ang 3 barangay sa Calamba, Laguna dulot ng mga pag-ulan mula sa mga nagdaang bagyong Rolly at Quinta.

Abot hanggang tuhod ang baha sa mga barangay ng Palingon, Lingga, at Sampiruhan sa Calamba City, base sa pag-iikot ngayong Miyerkoles ng ABS-CBN News.

Pero pinangangambahan umano ng mga residente na umabot hanggang baywang ang baha dahil sa inaasahang buhos ng ulang dala ng bagyong Ulysses kaya lumikas na ang mga residente.

Nasa 120 pamilya o halos 500 indibidwal ang lumikas sa 3 evacuation center sa Barangay Palingon, karamihan mga babae at bata.

Dala pa ng ibang lumikas ang mga self-learning modules para sa eskuwela para sa evacuation center muna ipagpatuloy ang pag-aaral.

"'Yong ilalim ng bahay namin hanggang hita na ang tubig," anang residenteng si Normita del Castillo.

"Napakahirap talaga para sa amin. Pagka bumaba na ang tubig saka kami babalik," dagdag niya.

Pinili naman ng padre de pamilya na si Romeo Ayangco na magpaiwan sa bahay para mabantayan ang ito at mga ari-arian sa kabila ng peligro.

"Pero kung lalakas talaga, susunod na rin ako doon," ani Ayangco.

Nasa gilid lang ng Laguna de Bay ang 3 barangay kaya mabilis pasukin ng tubig ang mga kalsada at bahay kapag umapaw ang lawa.

"Halos lahat ng takbo ng tubig ay dito pumupunta sa area namin," ani Jay Abesamis, administrator ng Barangay Palingon.

Nagdagdag na ng evacuation centers ang Laguna, at namahagi ng relief packs at face masks sa mga lilikas.

"Lahat ng precautionary measures ginawa natin. Nagko-coordinate kami sa mga barangay at in-activate ang incident command system," ani Jeff Rodriguez, disaster officer sa Calamba.

"'Yong evacuation facilities, not designed sa current situation na may COVID... ginawan din namin ng paraan para masigurong ligtas ang aming constituents. May health officers na nakaantabay," ani Rodriguez.

Maging ang ilang paaralan ay gagamitin bilang evacuation center, ani Rodriguez.

Nagsagawa na rin ng pre-emptive evacuation sa mga residenteng nakatira sa Sitio South Side, Barangay San Antonio sa bayan ng San Pedro.

FROM THE ARCHIVES:

Watch more in iWantTFC

-- Ulat ni Bianca Dava, ABS-CBN News

Bisitahin ang Patrol.PH para sa iba pang mga balita.