'Cashless payment, sariling helmet': Guidelines sa pagbabalik ng motorcycle taxis inilabas

ABS-CBN News

Posted at Nov 10 2020 03:40 PM | Updated as of Nov 10 2020 08:59 PM

Matatandaang pinayagan na ng pandemic task force ng bansa ang pagbiyahe ng mga motorcycle taxi pero ipinaplantsa pa sa ngayon ang mga protocol para rito. Mark Demayo, ABS-CBN News/File

MAYNILA (UPDATE) - Naglabas na ng panuntunan ang pandemic task force ng bansa para sa pagbabalik-pasada ng mga motorcycle taxi. 

Sa isang public press briefing, inilatag ito ni Presidential Spokesperson Harry Roque, na siya ring pandemic task force spokesman. 

Base sa guidelines na inilabas ng National Task Force against COVID-19), inoobliga ang mga pasahero na magdala ng sariling helmet, at sumunod sa cashless payment scheme ng ride hailing app. 

Maaalalang sinabi ng Malacañang na maaari nang ipagpapatuloy ang pilot study para sa paggamit ng mga motorcycle taxi - na nahinto dahil sa coronavirus disease (COVID-19) pandemic. 

Sinimulan ang naturang pag-aaral noong 2019 para aralin kung ligtas ang motorsiklo bilang pampublikong sasakyan. 

MOTORCYCLE RIDER

Para sa mga motorcycle rider, dapat nakasuot ng pantalon, closed shoes at t-shirt ang mga rider na magsisilbing "protective gear."

Dapat may sariling helmet na naka-disinfect ang rider. May suot din dapat itong reflectorized vest, ID card, at face mask. Dapat ding sumailalim sa COVID-19 swab test bago payagang bumiyahe ang rider. 

Watch more in iWantTFC

Dapat ding may barrier na aprubado alinsunod sa National Task Force (NTF) protocols, at wala dapat "modified" na parte ang gagamiting motor. 

Kailangang i-disclose ng rider ang kaniyang temperatura, at punan ang health declaration form bago pumasada araw-araw. 

Watch more in iWantTFC

PASAHERO 

Gaya ng mga rider, kailangang naka-t shirt, pantalon, at closed shoes ang mga pasahero. Dapat din silang may sariling helmet - na magsisilbing face shield - at face mask. 

Bago ang kada booking, dapat ding punan ng customer ang health declaration form. 

Bawal naman sumakay ang mga person with disability na hindi makakahawak nang maayos, mga buntis, at mga nakainom o nasa impluwensiya ng droga. 

Matatandaang itinigil ang operasyon ng mga motorcycle taxi sa pagsuspinde ng mass transport nang isailalim ang bansa sa community quarantine. 

Paunti-unti ngayong pinapayagan ng gobyerno ang iba't ibang uri ng transportasyon, alinsunod sa inirerekomendang physical distancing protocols. 

Ayon sa Land Transportation Office, kung maipapakita ng mga kompanya na kaya nilang ipatupad ang buong guidelines ay maaari na umanong simulan ang pilot study. 

Sa Teleradyo, sinabi ni Angkas chief transport advocate George Royeca na nakatakdang mag-convene ang technical working group ng Land Transportation Franchising and Regulatory Board para pag-usapan ang implementasyon nito. 

Handa naman daw sumunod sa mga bagong panuntunan ang ride-hailing app, pero aminado sila na maaaring magdulot pa ito ng kalituhan sa una. 

"We expect some issues and some confusion... Those are going to be two main stumbling blocks in adoption but that's okay because those are non-negotiable," ani Royeca. 

Naghahanda na rin ang isa pang ride-hailing app na Joyride, ayon sa kanilang Vice President for Corporate Affairs na si Alex Eala. 

Wala pang petsa sa ngayon kung kailan sisimulan ang extended pilot testing. 

-- May ulat ni Jasmin Romero, ABS-CBN News

Bisitahin ang Patrol.PH para sa iba pang mga balita.