Siksikan sa nasisirang MRT? Mga P2P bus maaaring alternatibo

ABS-CBN News

Posted at Nov 09 2017 01:46 PM

Sumailalim sa dry run, o pagsubok, nitong Huwebes ang mga point-to-point bus na magsisilbing alternatibo para sa mga pasaherong nahihirapang sumakay sa MRT-3.

Ayon kay Aileen Lizada, tagapagsalita ng Land Transportation Franchising and Regulatory Board (LTFRB), apat na bus ng Metropolitan Manila Development Authority (MMDA) muna ang kanilang ipinakalat mula alas-6 hanggang alas-9 ng umaga.

Umalis ang unang bus bago mag-alas-7 ng umaga kahit walong tao pa lang ang sakay.

Balak sanang umalis ng tatlong natirang bus sa magkakasunod na oras, mula alas-7 hanggang alas-9 ng umaga, ngunit mas maaga itong napaalis dahil sa dami ng mga pasaherong sumakay.

Sa North Avenue magmumula ang mga bus at magbababa sa Ortigas bago dumeretso sa Ayala. Hindi pahihintulutan ang pagsakay ng mga pasahero sa Ortigas.

Mula alas-5 ng hapon hanggang alas-8 ng gabi, magsasakay ang mga bus mula Ayala deretso hanggang North Avenue.

Dadaan ang mga bus sa yellow outer lane ng EDSA at sasabayan ng mga traffic enforcer upang mas mapabilis ang biyahe.

Pinaalalahanan ang mga sasakay na ordinaryong bus lamang ang ginagamit kaya't walang air-conditioner.

Ayon kay Lizada, sisikapin nilang madagdagan ang bus at maparami ang biyahe.

Sa Biyernes, Nobyembre 10, nakatakda ang tuluyang pagpapatupad ng mga point-to-point bus na babaybay sa kahabaan ng EDSA mula North Avenue hanggang Ayala at Taft Avenue.

-- May ulat ni Ron Lopez, ABS-CBN News

Bisitahin ang Patrol.PH para sa iba pang mga balita.