Ilang taga-Catanduanes halos 4 na oras ang nilakad para makakuha ng relief goods

ABS-CBN News

Posted at Nov 05 2020 04:33 PM | Updated as of Nov 05 2020 10:08 PM

Nagsampay ng damit ang isang lalaki sa isang natumbang poste ng kuryente sa San Andres, Catanduans noong Nobyembre 4, 2020. George Calvelo, ABS-CBN News

Gutom na ang ilang taga-Virac, Catanduanes na hindi maabutan ng relief goods dahil hindi pa rin madaanan ang ilang kalsada sa lugar kasunod ng pananalasa ng bagyong Rolly.

Kinailangan pang maglakad ng nasa 200 residente, kasama ang 57 anyos na si Gloria Tria, nang halos 4 na oras para makarating sa Barangay Hicming, kung saan nagpadala ng relief goods ang lokal na pamahalaan.

Si Tria ay taga-Barangay Dugui Too, na hindi maabutan ng tulong dahil sa landslides at mga putol na kalsada.

Watch more in iWantTFC

Ininda umano ni Tria ang pananakit ng tuhod sa sa higit 8 kilometrong lakad.

Ayon kay Tria, gutom na sila at kapag naubos ang mga natirang tanim ng saging at gabi ay wala na silang kakainin.

Nakakuha ng 5 kilong bigas at ilang de-lata si Tria, na puwede na raw na panlaman sa kumakalam na sikmura para sa ilang araw.

Isa lang ang Dugui Too sa 3 barangay na hindi naabot ng relief goods. Wala rin umanong komunikasyon sa mga lugar dahil bagsak pa rin ang signal.

Aminado rin ang lokal na pamahalaang hirap silang makalikom ng relief goods.

Maaga pa lang, nakaabang na sa paliparan ng Virac si Mayor Sinforoso Sarmiento Jr. sakaling may dumating na tulong.

"Para 'yong Virac mauna sa mga relief na ibibigay kasi kami talaga ang hard hit," ani Sarmiento.

Watch more in iWantTFC   Jacque Manabat, ABS-CBN News

Wala ring magawa ang lokal na pamahalaan kundi manghingi, lalo't nabasa lahat ng 8,000 sako bigas ng National Food Authority sa Catanduanes matapos sirain ng bagyo ang warehouse.

Mahaba rin ang pila sa mga water refilling station dahil wala pa ring sapat na supply ng tubig ang bayan.

Nauna nang inamin ng provincial government ng Catanduanes na sasapat lang nang 2 o 3 araw ang dumarating na pagkain sa kanila.

Nakadapa na ang kanilang palayan at mga puno ng abaca, na pangunahing kabuhayan ng mga residente.

Pero tiniyak ng Malacañang na hindi pababayaan ng national government na magutom ang mga taga-Catanduanes.

"Hindi po papayagan ni Presidente Duterte na magkulang ng pagkain at tubig sa Catanduanes, iyan po ay pangako ng presidente. Katunayan, 60 tons po ng relief goods ay naririyan na," ani Presidential Spokesperson Harry Roque.

-- Ulat ni Jacque Manabat, ABS-CBN News

Bisitahin ang Patrol.PH para sa iba pang mga balita.