Water interruption sa ilang lugar sa Metro Manila, extended

Jekki Pascual, ABS-CBN News

Posted at Nov 01 2021 09:39 AM | Updated as of Nov 01 2021 12:20 PM

MAYNILA (UPDATE) — Extended ang water interruption sa ilang lungsod sa Metro Manila. 

Ayon sa Maynilad, nagkaroon lang ng hamon sa worksite sa pipe realignment nila para sa flood control project ng Department of Public Works and Highways.

Dapat ngayong Lunes babalik na ang suplay ng tubig sa maraming mga customer ng Maynilad. Pero hindi pa ito matutuloy para sa ilang mga barangay.

"Humihingi kami ng paumanhin sa abala na dulot nitong nasabing pipe realignment," ani Maynilad corporate communications head Jennifer Rufo sa panayam sa TeleRadyo, Lunes.

"Ginagawa naman po natin ang lahat para mapabilis pa po 'yung ating trabaho sa Sobriedad na hindi naman po malagay sa alanganin 'yung kaligtasan ng ating mga worker."

Extended hanggang 2 p.m. ng Nobyembre 2 ang water interruption. Sakop nito ang ilang barangay sa Maynila, Parañaque, Pasay at Makati. 

 

Tuloy-tuloy pa rin ang pag-aayos sa worksite sa Sobriedad St. sa Sampaloc. May ilang residente malapit sa site ang may tubig na, pero 'yung ilang kapitbahay nila ay wala pa. 

Ayon sa isang nanay, 4 na araw na silang walang tubig at nahihirapan na lalo at may anak siyang nurse na kailangan talaga maligo at maglaba ng damit araw-araw dahil sa COVID-19 ward nagtatrabaho.

May mga water tanker na pinadala ang Maynilad at mga fire volunteers. Pero ayon sa ilang residente, pagdating ng mga truck, unahan ang mga tao at hindi na nasusunod ang physical distancing.

Anila, sana mas maraming tubig ang maibigay sa kanila.

Ayon kay Rufo, nasa 69 na ang umiikot na mobile water tanker para magrasyon ng tubig sa mga apektadong residente.

Meron ding 16 stationary water tanks ang nakatalaga sa iba't ibang lugar kung saan mahaba ang service interruption, aniya.

Ang pipe realignment project ng Maynilad ay para sa flood control project ng DPWH. Kung walang aberya, posibleng bumalik na ang tubig sa Martes.

Watch more News on iWantTFC