Bahagi ng puno, bumagsak sa bubong ng walkway sa Mandaluyong

Anjo Bagaoisan, ABS-CBN News

Posted at Nov 01 2020 10:47 PM

MAYNILA - Bukod sa pagpapalikas ng tao sa ilang mga lugar, nirespondehan din ng mga rescue teams sa Metro Manila ang mga nagbagsakang mga bahagi ng puno dahil sa malakas na hangin na dala ng bagyong Rolly. 

Bumagsak sa bubong ng lakaran sa gilid ng Hulo Integrated School sa Bgy. Hulo, Mandaluyong ang natanggal na sanga ng puno na nasa loob ng paaralan bago mag-alas-6 ng gabi. 

Naharang ang bahagi ng Barangka Drive dahil sa bumagsak na sanga. 

Gumamit ng chainsaw at mga itak para putulin sa maliliit na bahagi ang nahulog na mga sanga para mas madaling alisin at itambak sa mga truck. 

Inabot ng isang oras ang pag-aalis ng bahagi ng puno. 

Wala namang naputol na kable ng kuryente o nadamay na tao sa pangyayari. 

Watch more in iWantTFC
Bisitahin ang Patrol.PH para sa iba pang mga balita.