KILALANIN: Mag-asawang 20 taon nang nakatira sa sementeryo

Lyza Aquino, ABS-CBN News

Posted at Oct 30 2017 08:43 AM | Updated as of Oct 30 2017 09:52 AM

MANILA - "Mas masaya manirahan kasama ang mga patay... kaysa sa mga buhay."

Ito ang pahayag ni Adinita Benavidez, na 20 taon nang naniniranan kasama ang kanyang mister sa mawsoleo ng pamilya Bagatsing sa Manila North Cemetery.

Kuwento ni Benavidez, nawalan sila ng tirahan noong 1997 matapos i-demolish ang kanilang bahay sa Manila North Green Park, ilang kanto ang layo mula sa sementeryo.

Mula noon, pinayagan ng mga Bagatsing ang pamilya ni Benavidez na manirahan sa mawsoleo kapalit ng paglilinis at pag-aalaga sa lugar kasabay ng kanilang pagtitinda ng kandila.

May sarili nang pamilya at tirahan ang mga anak nina Benavidez at mister na si Herman. Tanging kasama ng mag-asawa sa mawsoleo ang kanilang 3 aso.

Sa loob ng mawsoleo na itinuring nilang tahanan, mayroong banyo, 2 plastik na papag, 3 puntod, TV, radyo at maliit na kalan ang mag-asawa.

Bagaman sanay na silang manirahan dito, pangarap pa rin Benavidez na magkaroon ng kahit simpleng bahay.

Bisitahin ang Patrol.PH para sa iba pang mga balita.