PatrolPH

COVID-19 vaccination ng mga batang may comorbidity sa labas ng NCR simula na

ABS-CBN News

Posted at Oct 29 2021 02:00 PM | Updated as of Oct 29 2021 09:04 PM

Umarangkada na ang pagbabakuna kontra COVID-19 ng mga edad 12 hanggang 17 anyos na may health risks sa Jose B. Lingad Memorial General Hospital sa San Fernando, Pampanga. Parte ito ng pagpapalawak ng vaccination drive sa mga bata sa labas ng Metro Manila. ABS-CBN News/ File
Umarangkada na ang pagbabakuna kontra COVID-19 ng mga edad 12 hanggang 17 anyos na may health risks sa Jose B. Lingad Memorial General Hospital sa San Fernando, Pampanga. Parte ito ng pagpapalawak ng vaccination drive sa mga bata sa labas ng Metro Manila. ABS-CBN News/ File

MAYNILA (2ND UPDATE) - Umarangkada na ang pagbabakuna kontra COVID-19 ng mga edad 12 hanggang 17 anyos na may health risks sa labas ng Metro Manila. 

Ito ay parte ng ikatlong phase ng pagbabakuna ng mga kabataan sa bansa. 

Umabot na sa higit 70 ang tumanggap ng unang dose ng COVID-19 vaccines ng Pfizer sa Jose B. Lingad Memorial General Hospital sa San Fernando, Pampanga. 

Bibigyang prayoridad dito ang mga pasyente sa ospital. 

Ayon sa medical center chief na si Dr. Monserrat Chichioco, wala pang naitatalang adverse event tulad ng allergy, pamamantal, o altapresyon matapos bakunahan. 

Wala pa rin anilang nag-defer. 

Watch more on iWantTFC

Higit 100 vaccination sites sa iba't ibang rehiyon sa bansa maliban sa Bangsamoro Autonomous Region in Muslim Mindanao ang pinayagan nang magpabakuna ng mga batang may health risk. 

Karamihan dito ay mga ospital pa rin. 

Nagsimula na rin ang pagbabakuna sa Calabarzon. Ang Laguna, isinagawa ang pagbabakuna sa mega vaccination site sa Barangay San Jose, San Pablo City. 

Bukod sa Laguna, isinagawa rin ang pediatric vaccination sa General Emilio Aguinaldo Hospital sa Cavite, Batangas Medical Center sa Batangas, Margarito A Duavit Memorial Hospital sa Rizal at Quezon Medical Center sa lalawigan ng Quezon.

Sa Ilocos Norte, isinagawa ang pagbabakuna sa Mariano Marcos Memorial Hospital and Medical Center (MMMHMC), kung saan umabot na sa 65 ang nabakunahan sa kanila. 

Ayon kay Dr. Gretchen Ranada, Head ng Public Health Unit at Chairman ng Vaccine Operations ng MMMHMC, wala namang nakaranas ng negative side effects sa kanilang nabakunahan.

Isinagawa sa St. Paul's Hospital ang pagbabakuna sa mga menor de edad sa Iloilo City. Target na mabakunahan ng ospital ang nasa 250 na mga menor de edad na may comorbidities.

Sa pagpapalawig naman ng child vaccination drive sa Nobyembre 3 aarangkada ang pagbabakuna sa Ateneo de Iloilo, University of San Agustin, at Robinson's Jaro.

Sa Manuel J. Santos Hospital, isinagawa ang pagbabakuna ng mga bata sa Butuan City, kung saan mahigit 20 ang nabakunahan. 

Umarangkada na rin ang pagbabakuna ng mga kabataan sa Davao Region. 

Sa Davao City, isinagawa ito sa Southern Philippines Medical Center, pero mayroon ding vaccination sites sa Metro Davao Medical and Research Center at Seamen's Hospital.

Nakatakdang ilunsad din ang bakunahan sa kabataan sa Davao Regional Medical Center sa Tagum City, Davao de Oro Provincial Hospital, Davao del Sur Provincial Hospital, at Davao Oriental Provincial Medical Center.

Ayon kay Dr. Annabelle Yumang, DOH XI Regional Director, inaasahan nilang mabakunahan ang 620,216 na pediatric A3 population sa Davao region.

Sa Central Visayas, isinagawa ito sa Cebu City Medical Center at Vicente Sotto Memorial Medical Center; Governor Celestino Gallares Medical Hospital at Don Emilio del Valle Memorial Hospital sa Bohol; Negros Oriental Provincial Hospital at Siquijor Provincial Hospital.

Aabot sa 929,826 kabataan sa rehiyon ang maaaring bakunahan kontra COVID-19. 

Ayon sa Department of Health Caraga, kailangan may clearance ng doktor ang mga minor with comorbidities na babakunahan. 

Kailangan may informed consent at assent. Ibig sabihin ang kanilang magulang ay kailangan magbigay ng consent, pipirma sila sa dokumento at 'yung bata ay may assent para rito.

Sa Cagayan De Oro, sinumulan ang pagbabakuna sa 50 kabataang nakapag-pre-register sa JR Borja General Hospital.

Sa higit 23,700 na batang binakunahan kontra COVID-19 hanggang noong Oktubre 26, 25 o 0.1 porsiyento lang ang nakaranas ng adverse event, kung saan 3 ay nakaranas ng severe allergy. 

Pero karamihan naman ay mild tulad ng pananakit sa injection site, rashes, at nag-palpitate dahil sa anxiety na natugunan naman daw, ayon sa Department of Health. 

Watch more on iWantTFC

Ipinaalala na dapat may bitbit na ID at medical certificate na patunay ng comorbidity, at dapat may kasamang magulang o guardian at patunay ng relasyon sa bata. 

Sisimulan din sa Nobyembre 3 ang pagbabakuna ng general pediatric population o iyong mga edad 12 hanggang 17 na walang health risks sa Metro Manila at iba pang lugar na handang magpatupad nito. 

Hindi bababa sa 80 porsiyento ng kabuuang 12.7 milyong batang edad 12 hanggang 17 sa bansa ang target makumpleto ang bakuna sa katapusan ng taon. 

— Ulat ni Vivienne Gulla, ABS-CBN News, at nina Grace Alba, Rod Bolivar, Charmaine Awitan, Annie Perez, Hernel Tocmo, Rolen Escaniel, at Andrew Bernardo
 

Bisitahin ang Patrol.PH para sa iba pang mga balita.