PatrolPH

Pagbabakuna kontra COVID sa mga 12-17 anyos sa buong bansa, sisimulan sa Nov. 3

ABS-CBN News

Posted at Oct 27 2021 05:56 PM | Updated as of Oct 27 2021 06:59 PM

Pagbabakuna sa isang bata kontra COVID-19 sa Pasig City noong Oktubre 15, 2021.
Pagbabakuna sa isang bata kontra COVID-19 sa Pasig City noong Oktubre 15, 2021. Jonathan Cellona, ABS-CBN News

MAYNILA— Bubuksan na sa buong bansa simula Nobyembre 3 ang pagbabakuna kontra COVID-19 sa mga batang edad 12 hanggang 17, ayon sa Department of Health ngayong Miyerkoles.

Ayon kay Health Undersecretary Maria Rosario Vergeire, binubuo na ang guidelines sa pagbabakuna. 

"Pfizer and Moderna vaccines will still be used among children during the nationwide rollout. Further guidelines with regard to the nationwide expansion of pediatric vaccination will be released once finalized," sabi ni Vergeire.

Ayon kay vaccine "czar" Carlito Galvez Jr., may sapat nang suplay ng bakuna para isagawa ito. 

Watch more on iWantTFC

Naging maayos din anila ang paunang rollout ng COVID-19 vaccines sa mga batang may comorbidity sa Metro Manila na sinimulan kalagitnaan ng Oktubre. 

"Until now… we never heard [of] any major adverse effect. Now we have more than enough supply for our children, at saka nakita natin umabot na tayo ng 42 million (doses) sa ating warehouses at storage natin, and we have enough deliveries coming in," ani Galvez. 

Oras na gumulong ang malawakang COVID-19 vaccination sa mga eligible na bata ay pwede na ring gamitin ng pribadong sektor ang mga binili nitong Moderna vaccines sa mga anak ng empleyado, ayon kay Galvez. 

Aarangkada na rin sa Oktubre 29 ang phase 3 sa pagbabakuna ng mga batang may health risks, na palalawakin sa 162 piling vaccination centers sa lahat ng rehiyon sa bansa mula sa 39 sites lang sa Metro Manila. 

Sa ngayon, 18,666 batang may comorbidities na ang nabakunahan sa pilot ng pediatric vaccination ngayong buwan sa Kamaynilaan.

Ginawa ito sa ilang ospital gamit ang Pfizer at Moderna vaccines. 

Ayon sa DOH, nasa 12.7 milyong kabataan ang may edad 12 hanggang 17 ngayong taon sa bansa.

Patuloy namang inaanyayahan ng DOH ang adult population lalo na ang mga high risk na magpabakuna na kontra COVID-19 at sumunod pa rin sa minimum public health standards kahit bakunado na.

— May mga ulat ni Vivienne Gulla, ABS-CBN News

Kaugnay na video: 

Watch more on iWantTFC
Bisitahin ang Patrol.PH para sa iba pang mga balita.