Liliw, Laguna nawalan ng kuryente

Anjo Bagaoisan, ABS-CBN News

Posted at Oct 26 2020 12:16 PM

Halos 40 pamilyang nakatira malapit sa mga ilog sa Liliw, Laguna ang inilikas dahil sa pinangangambahang pagbaha. Retrato mula sa Liliw Municipal Disaster and Risk Reduction Management Office

Nawalan ng kuryente ang 33 barangay na bumubuo sa Liliw, Laguna mula pa noong gabi ng Linggo, na posibleng dahil umano sa mga ulan at malakas na hanging dala ng bagyong Quinta.

Ayon kay Annie Angat, officer ng Liliw Municipal Disaster and Risk Reduction Management Office (MDRRMO), bago mag-hatinggabi ay pinutol ang kuryente sa bayan at inasahang babalik sana bago mag-alas-3 ng madaling araw.

Pero hanggang alas-9 ng umaga o 9 na oras na ang nakalilipas ay wala pa ring supply ng kuryente sa Liliw.

Posibleng may naapektuhang linya ng kuryente dahil sa magdamag na buhos ng ulan at malakas na hanging dala ng bagyong Quinta, ani Angat.

Samantala, aabot naman sa 37 pamilya ang inilikas noong gabi ng Linggo mula sa 3 barangay sa Liliw dahil sa banta ng pagbaha.

Ayon kay Krich Monfero, disaster officer, nagsagawa ng preemptive evacuation sa mga residente ng mga barangay ng Bayate, Calumpang, at Oples dahil sa pangambang pag-apaw ng tubig sa mga ilog sa mga naturang lugar.

Sa katunayan, umapaw na sa kalsada ang tubig sa Oples River na malapit sa mga barangay. Nananatili namang mataas ang antas ng tubig sa Lapad River na katabi ng Bayate at Calumpang.

Binabantayan ang lagay ng ilog bago magpasyang pauwiin ang mga residente, sabi ng Liliw Muniicpal Disaster and Risk Reduction Management Office.

Wala namang pagbaha sa mga residential area pero may hangin at tuloy pa ring ang mga pag-ulang dala ng bagyong Quinta.

Bukod sa Liliw, libo-libong kabahayan din sa Batangas ang nawalan ng kuryente dahil sa bagyong Quinta.

Bisitahin ang Patrol.PH para sa iba pang mga balita.