Mahigit P10-M halaga ng shabu nasamsam sa 2 suspek

Inaresto ang 2 lalaki sa magkahiwalay na anti-drug operation ng Philippine Drug Enforcement Agency (PDEA) at pulisya sa Caloocan at Quezon City.

P3.4-milyon halaga ng shabu, nakumpiska sa delivery rider sa buy-bust operation sa Caloocan City.

📸: PDEA Region 3 / Police-Big Brother pic.twitter.com/0BYhcNUIzW

— Anjo Bagaoisan (@anjo_bagaoisan) October 24, 2021

Nakuhaan ng kalahating kilo ng shabu ang isang 38-anyos na delivery rider na hinuli sa labas ng fast food chain sa Barangay 84, Caloocan noong Sabado.

Isinagawa ang operasyon ng mga taga-PDEA Central Luzon kasama ang Caloocan police.

Ayon sa PDEA, taga-GMA, Cavite ang suspek.

Nakalagay sa 2 plastic bag ang nakumpiskang droga at tinatayang may halagang P3.4 milyon.

Buy-bust sa labas ng mall sa Commonwealth Avenue sa QC, nagresulta sa pagsamsam ng halos P7-milyong halaga ng droga mula sa nahuling suspek

📸: PDEA pic.twitter.com/ocbHZd8GQ4

— Anjo Bagaoisan (@anjo_bagaoisan) October 24, 2021

Inaresto naman ang isa pang lalaking drug suspect sa labas ng isang mall sa Commonwealth Avenue sa Batasan Hills, Quezon City noong Linggo.

Sa buy-bust ng PDEA Calabarzon at NCR sa parking lot ng mall, hinuli ang suspek na si alyas Mohammad pasado alas-6 ng gabi.

Tinatayang may halagang P6.9 milyon (halos 7 milyong piso) ang nasa 1 kilo ng shabu na nasabat sa kanya.

Kapwa nahaharap ang 2 suspek sa kasong paglabag sa anti-drug law.