Traslacion sa 2021 kanselado dahil sa pandemya

ABS-CBN News

Posted at Oct 23 2020 02:18 PM | Updated as of Oct 23 2020 09:01 PM

Kinansela ng lokal na pamahalaan ng Maynila ang Traslacion ng Poong Nazareno sa taong 2021 dahil sa coronavirus disease (COVID-19) pandemic. Jonathan Cellona, ABS-CBN News

MAYNILA— Kinansela ng lokal na pamahalaan ng Maynila ang Traslacion ng Poong Nazareno sa taong 2021 dahil sa patuloy na coronavirus disease (COVID-19) pandemic.

Sa anunsiyo ng Manila Public Information Office, nagkasundo ang lokal na pamahalaan at ang simbahan na kanselahin ang Traslacion, na gaganapin sana sa Enero 9 dahil sa patuloy na banta ng COVID-19. Dinudumog ang prusisyon ng milyon-milyong deboto taon-taon.

Watch more in iWantTFC

Ayon kay Manila Mayor Isko Moreno, mas mahalagang sundin ngayon ang health protocols kaysa ipagpatuloy ang tradisyon para na rin sa kaligtasan ng mga deboto. Una niya ring nabanggit na maaaring makansela ang prusisyon dahil sa pandemya.

"There is no harm in having none for a year or two. Because there still a hundred years, 50 years, 20 years, ten years, five years... to continue to practice 'yung pamana, 'yung kustumbre at 'yung pamamanata," ani Moreno.

Umapela rin si Moreno na huwag nang magsagawa ng ano mang prusisyon at parada para hindi malagay sa alanganin ang kalusugan ng publiko.

Watch more in iWantTFC

Aminado naman si Quiapo Church rector Msgr. Hernando Coronel na nalulungkot siya sa pagkansela sa Traslacion pero tiniyak niya na susundin ng simbahan ang direktiba ng lokal na pamahalaan.

Daragdagan na lang aniya ang mga misa sa Enero 9 para sa mga deboto ng Nazareno.

Kahit kanselado na ang Traslacion sa 2021, tiniyak ni Quiapo Church Parochial Vicar Fr. Douglas Badong na tuloy pa rin ang pagdiriwang ng Pista ng Poong Nazareno.

Paliwanag ni Badong, may ilang pagbabagong gagawin sa susunod na taon.

Isa rito ang pagpapahaba ng misa-novena. Gagawin ding "localized" ang pagdiriwang. Hihikayatin ang lahat ng simabahan sa bansa na magmisa para sa kapisatahan.

Magdaragdag naman ng LED monitor ang Quiapo Church para hindi magsiksikan sa loob.

Plano rin ng simbahan na agahan ang replica blessing at paikutin ang 3 imahe ng Poon na dadalaw sa iba't ibang lugar ngayong hindi na makakapunta sa Quiapo Church ang mga deboto.

"Magtatalaga kami ng lugar kung saan dadalaw ang Imahe ng Nazareno at kung saan sila pwedeng makapagsimba, at least isang araw ng nobenaryo. So mayroon po sa South, sa North area from Batangas pabalik ng Quiapo, from Pangasinan pabalik ng Quiapo. May 3 imahe ang iikot sa iba't ibang lugar para maranasan man lang nila ang isang araw ng novena dito sa Quiapo," ani Badong.

Nakiusap din siya sa mga deboto na unawain ang sitwasyon lalo't wala na rin muna ang tradisyonal na pahalik.

“Nauunawaan namin na hindi puwede 'yung Luneta to Quiapo na
prusisyon... hihingi kami ng tulong sa lahat ng simbahan sa buong
Pilipinas at kung puwede sa ibang bansa.. na sumabay sa pagno-novena mass dito sa Quiapo," ani Badong.

-- Ulat ni Jerome Lantin, ABS-CBN News

Bisitahin ang Patrol.PH para sa iba pang mga balita.