12 tulay sa Isabela lubog sa tubig matapos ang hagupit ni Pepito

ABS-CBN News

Posted at Oct 21 2020 07:27 PM | Updated as of Oct 21 2020 09:45 PM

Watch more in iWantTFC

SANTIAGO CITY, Isabela — Baha at pagguho ng lupa ang idinulot ng bagyong Pepito sa bahagi ng north at central Luzon.

Isa sa mga todong hinagupit ng bagyo ang lalawigan ng Isabela.

Bumuti na ang lagay ng panahon ngayong Miyerkoles, pero kalbaryo ito sa mga residente dahil sa pag-apaw ng ilog na naging sanhi ng baha. 

Inilikas sa evacuation center ang nasa 100 pamilya sa Barangay District 3, Cauayan City. Binaha ang kanilang mga bahay matapos na umapaw ang katabing ilog bunsod naman ng pag-ulan dala ng bagyong Pepito.

"Sa ngayon meron pa rin ulan at wala pa pong ulat na magpapalabas ng tubig sa dam, pero pagka nagpalabas na sila, sigurado pong tataas ang tubig," ani Melchor Meris, chairman ng Barangay District 3.

Sa kabuuan, 12 tulay ang apektado sa pag-apaw ng ilog sa Isabela.

Mga tulay na nalubog sa pag-apaw ng ilog: 

Ilagan City

  • Baculud bridge
  • Cabisera 8 bridge

 Cabagan Sto. Tomas

  • Cansan bridge

 Cabagan Sta. Maria

  • Mozzozzin Sur bridge

 Cauayan City

  • Alicaocao bridge
  • Gappal bridge
  • Duro bridge 
  • Sipat bridge

 Echague

  • Gucab bridge
  • Annafunan bridge

 Quirino

  • Sto. Domingo bridge

 San Agustin

  • Masaya Sur bridge

Patuloy na pinag-iingat ang mga residente lalo ang mga nakatira malapit sa Magat river sa posibleng epekto nang pinakakawalang tubig ng Magat dam.

Abot sa 200 cubic meter per second o katumbas ng 1,000 drum ng tubig ang pinalabas Miyerkoles ng madaling araw. Ito ay para raw masiguro ang ligtas na nibel o antas ng dam lalo’t may bumababa pang tubig galing sa watershed areas gaya sa Nueva Vizcaya. —Mula sa ulat ni Harris Julio, ABS-CBN News

Bisitahin ang Patrol.PH para sa iba pang mga balita.