PatrolPH

P354,000-halaga ng 'marijuana' nakita sa loob ng mga speaker sa Maynila

Jekki Pascual, ABS-CBN News

Posted at Oct 20 2021 09:27 AM

MAYNILA—Arestado ang isang lalaki na nakuhanan ng hinihinalang marijuana sa Tondo, Maynila nitong Martes.

Ayon kay Police Col. Magno Gallora, hepe ng Moriones Police Station, nasita ng mga police ang 27 anyos na lalaki sa kanto ng Asuncion at Recto sa may Divisoria.

Wala kasing suot na face mask ang lalaki na may bitbit na 6 na mga kahon.

Kinapkapan ang lalaki at na-check din ang dala niyang mga kahon. May nakitang mga speakers sa loob, at nagulat ang mga awtoridad nang makitang may mga nakasilid sa loob ng mga speakers.

Napag-alaman na mga hinihinalang marijuana dried leaves na nakabalot sa plastik ang nasa loob. Aabot ng 2.9 kilos ang bigat ng droga na may street value na P354,000.

Inaalam na ng mga pulis kung saan binili ng suspek ang droga at kung saan niya dadalhin ang mga speakers. Nakakulong na siya sa MPD Station 2.

Bisitahin ang Patrol.PH para sa iba pang mga balita.