PatrolPH

Grupo ng LGUs nabulaga sa pagpapatupad ng alert level system sa mga probinsiya

ABS-CBN News

Posted at Oct 20 2021 03:25 PM | Updated as of Oct 20 2021 07:14 PM

Pamimili sa Dapitan Market noong Oktubre 19, 2021, ilang araw matapos ipatupad ang COVID-19 Alert Level 3 sa Maynila. Pinalawig ang pagpapatupad ng alert level system sa ilan pang lugar sa labas ng Kamaynilaan. Jonathan Cellona, ABS-CBN News
Pamimili sa Dapitan Market noong Oktubre 19, 2021, ilang araw matapos ipatupad ang COVID-19 Alert Level 3 sa Maynila. Pinalawig ang pagpapatupad ng alert level system sa ilan pang lugar sa labas ng Kamaynilaan. Jonathan Cellona, ABS-CBN News

MAYNILA (UPDATE) - Nabulaga ang grupo ng mga lokal na pamahalaan sa pagpapatupad ng alert level system sa ilang probinsiya simula ngayong Miyerkoles. 

Sa panayam sa TeleRadyo, sinabi ni League of Provinces President at Marinduque Governor Presbitero Velasco Jr. na nagulat sila sa biglaang pagpapatupad ng alert level system gayong kailangan pang paghandaan ito ng mga LGU. 

"May agam-agam po tayong mga gobernador na maaapektuhan bigla ng pag-implement ng alert level system dahil po biglaan nga po. Kailangan po naming pag-aralan 'yung mga rules din diyan, para makagawa po ng mga kaniya-kaniyang executive order ang mga local chief executives para matingnan 'yung reasonable regulations na puwede nilang i-impose," ani Velasco. 

Watch more on iWantTFC

"Kailangan ma-dissiminate o mabigyan ng mga kopya ang ating mga constituents at maipaliwanag mabuti ano bang effect nito," dagdag niya. 

Aniya, kailangan ng sapat na panahon ng mga lalawigan para maipaliwanag ito sa mga residente nila. 

Giit ni Velasco na hindi puwedeng biglaan ito lalo't dapat pang magpulong ang mga task force tungkol dito. 

Panawagan nila na ipagpaliban ito sa Nobyembre 1. 

Sinabi naman ng Union of Local Authorities of the Philippines (ULAP) na importanteng makarating sa publiko ang tamang impormasyon tungkol sa alert levels. 

"Alam natin ngayon na andami nating kababayan na talaga sa cellphone na kumukuha ng balita, 'no? 'Yan ang challenge talaga sa atin sa gobyerno, na maparating ang accurate information sa ating mga kababayan," ani ULAP President at Quirino Governor Dax Cua. 

Simula Oktubre 20 hanggang 31, ipatutupad ang alert levels sa ilang probinsiya at siyudad sa Luzon, Visayas at Mindanao, na ayon sa Malacanang ay bahagi ng pilot study ng bagong alert level system.

Nagsimula ang pilot implementation ng alert level system sa Kamaynilaan noong ika-16 ng Setyembre, na inaayon sa dami ng kaso ng COVID-19 at kapasidad ng mga ospital sa isang lugar. Sinasabayan ito ng pagpapatupad ng granular lockdowns. 

Watch more on iWantTFC

Samantala, sa pagpapatupad ng mas mababang alert levels ay dumami na ang mga nagpupunta sa mga mall sa labas ng NCR. 

Sa Batangas, na nasa Alert Level 2, dumami na rin ang mga namimil sa supermarket. 

"Mas marami nang tao ang lumabas, mas marami na ring tao ang nagda-dine-in sa dine-in establishments natin. So, we are seeing an increase already in our foot traffic and transactions," ani Bryan San Andres ng Vista Malls. 

Samantala, gusto naman ni Governor Dodo Mandanas na ilagay muna sa Alert Level 3 ang Batangas. 

"In line with our Batangas IATF sentiment re Alert Level, we appealed that we be under Alert 3 like Cavite, Laguna. Rizal and NCR," ani Mandanas. 

Hinimok naman nina Cavite Governor Jonvic Remulla at Laguna Governor Ramil Hernandez ang publiko na patuloy na sumunod sa health protocols. 

Pag-uusapan naman ng mga lokal na opisyal ng Cebu City ang pagbabalangkas ng bagong direktiba sa pagpapatupad ng Alert Level 2 sa lungsod. 

Ipinunto rin ni Acting Mayor Mike Rama na hindi masusunod ang ibang guidelines ng IATF tulad sa papalapit na Ungas kung saan bukas ang lahat ng sementeryo sa mga fully vaccinated.

-- May mga ulat ni Michael Delizo, ABS-CBN News

Bisitahin ang Patrol.PH para sa iba pang mga balita.