PatrolPH

Mga menor de edad sa NCR puwede nang bumiyahe basta kasama magulang, guardian

ABS-CBN News

Posted at Oct 19 2021 07:50 PM

Watch more on iWantTFC

MAYNILA - Pinapayagan nang bumiyahe ang mga kabataan basta't kasama ang kanilang mga magulang o guardian, batay sa resolusyong inilabas ng Metro Manila Council (MMC) nitong Martes. 

Ayon kay Metropolitan Manila Development Authority (MMDA) Chairman Benhur Abalos, na parte ng MMC, dapat ding magbitbit ng ID o ibang pruweba para mapatunayan ang edad ng bata at ang kasamang adult guardian o magulang. 

Pero paglilinaw ng mga awtoridad, papayagan lang ang mga ito kung bibili o kukuha ng essential goods o services, mag-i-interzonal at intra-zonal travel, outdoor exercises, at kung kailangang magtrabaho. 

Ibig sabihin, bawal pa rin pumunta sa mga mall ang mga bata, kasama man ang magulang o guardian, maliban na lang kung nasa mall ang kailangang goods o services. 

Kailangan lang magpakita ng pruweba bago makapasok. 

Kung may lalabag na establisimyento ay paparusahan ang mga ito. 

"Ang premise natin may safety seal, this is issued by multi-agencies like DOT, DTI, DILG, at DOLE. Kapag hindi nag comply, may mga inspectors sila, ire-record ang violations and complaints…kung hindi ito gagawin, magkakaron ng butas baka magsasara tayo ulit," ani Atty. Victor Pablo Trinidad, kinatawan ng MMDA sa IATF - Technical Working Group 

Ganito rin ang magiging patakaran sa mga senior na 65 pataaas basta't essential ang lakad o kung magtatrabaho. 

-- Ulat ni Doris Bigornia, ABS-CBN News

Bisitahin ang Patrol.PH para sa iba pang mga balita.