PatrolPH

Dating alkalde ng Marawi na kinasuhan ng rebelyon, kakandidatong mayor kasama ang anak

ABS-CBN News

Posted at Oct 16 2021 04:36 AM

Fahad Salic
Si Fahad “Pre” Salic, dating alkalde ng Marawi City na inakusahang nakipagsabwatan sa Maute Group sa Marawi Siege noong 2017.

Parehong tatakbo para sa pagka-alkalde ng Marawi City ang mag-amang Fahad “Pre” Salic at Panarigan “Coco” Salic sa eleksyon sa Halalan 2022. 

Pareho silang nabibilang sa UMMAH party.

Ayon kay Fahad Salic nitong Biyernes, naniniguro lang ang kanilang partido na may magtutuloy ng kaniyang mga adbokasiya sakaling may magtangka sa kaniyang buhay. 

Na-ambush si Fahad isang buwan bago ang eleksyon noong 2016 sa Cagayan de Oro. Paaatrasin naman daw niya ng kandidatura ang anak niyang si Panarigan sakaling payapa at matiwasay ang takbo ng kaniyang pangangampaniya.

Si Fahad ay dating mayor ng lungsod na kinasuhan ng rebelyon dahil sa umano'y pakikipagsabwatan at pagpupondo sa Maute Group sa Marawi Siege noong 2017. 

Matapos madetine ng higit isang taon, na-dismiss din ang kaniyang kaso. 

“Patunay 'yun na wala akong kinalaman. Alam naman ng mga taga-Marawi na wala akong kasalanan at hindi ako nagpabaya,” aniya.

Paniwala ni Salic na malaki ang kaniyang tsansa na manalo dahil isinisisi raw ng mga residente kay incumbent mayor Majul Gandamra na hindi pa sila napapabalik sa kanilang mga tahanan sa "ground zero" ng lungsod makalipas ang apat na taon mula nang mangyari ang pag-atake ng Maute Group.

Ayon naman kay Gandamra, hindi muna pinababalik ang mga bakwit sa ground zero dahil wala pang ilaw at tubig sa lugar.

— Ulat ni Roxanne Arevalo

KAUGNAY NA ULAT

Watch more on iWantTFC
Bisitahin ang Patrol.PH para sa iba pang mga balita.