Higit 31K katao nakadalaw na sa Manila South Cemetery

ABS-CBN News

Posted at Oct 16 2020 12:54 PM | Updated as of Oct 16 2020 09:37 PM

MAYNILA - Libo-libong katao na ang naitalang nakadalaw sa mga puntod ng kanilang yumaong mahal sa buhay sa Manila South Cemetery ngayong buwan ng Oktubre.

Ayon kay Raffy Mendez, tagapagsalita ng Manila South Cemetery, higit 31,000 katao ang bumisita sa sementeryo nila simula Okt. 1 hanggang 14. 

“Kahapon nagtala kami 847,” sabi ni Mendez sa panayam sa TeleRadyo Biyernes ng umaga.

Watch more in iWantTFC

Nauna nang hinikayat ng awtoridad ang maagang pagdalaw sa mga sementeryo dahil sa pagsasara ng mga ito sa panahon ng Undas para maiwasan ang pagdagsa ng mga tao sa gitna ng patuloy na COVID-19 pandemic. 

Patuloy naman aniya silang nag-iikot sa 25-ektaryang sementeryo na pinapatakbo ng Manila city government para tiyaking nasusunod pa rin ng mga bumibisita ang lahat ng naitalagang minimum health requirement.

“Sa South Cemetery, may mga announcement sa gate, mag-temperature (check), mag-alcohol, at mayroon face mask, face shield 'wag lang pong senior citizen, mga bata,” sabi niya.

Isasara ang mga sementeryo mula Okt. 29 hanggang Nob. 4 para hindi dumagsa ang mga tao at maiwasan ang pagkalat ng COVID-19.

Plano naman ni Mendez na magpamisa sa Nob. 1 para sa lahat ng mga nakalibing sa sementeryo.