PatrolPH

Ano'ng naging batayan ni VP Leni sa pagpili ng 'manok' sa pagkasenador?

ABS-CBN News

Posted at Oct 15 2021 05:45 PM | Updated as of Oct 16 2021 12:07 AM

Kasama sa mga ieendorso ni Vice President Leni Robredo sa pagkasenador sina dating Bise Presidente Jejomar Binay at Human Rights Lawyer Chel Diokno. Mga kuha nina Gigie Cruz at Jonathan Cellona, ABS-CBN News
Kasama sa mga ieendorso ni Vice President Leni Robredo sa pagkasenador sina dating Bise Presidente Jejomar Binay at Human Rights Lawyer Chel Diokno. Mga kuha nina Gigie Cruz at Jonathan Cellona, ABS-CBN News

MAYNILA (UPDATE) - May 11 nang pambato sa Senado si Vice President Leni Robredo. 

Ipinakilala niya ang anim pang nakasama sa koalisyon ng mga tatakbo at ieendorso niya at ng kanyang kampo sa pagkasenador nitong Biyernes. 

Kasama rito sina Atty. Alex Lacson at guest candidates na mga senador, sina Richard Gordon at Migz Zubiri. 

Narito rin si Sorsogon Governor Chiz Escudero at Sen. Joel Villanueva, maging si dating VP Jejomar Binay. 

Una nang pasok sa tiket ng Team Leni sina Sen. Risa Hontiveros at Sen. Leila De Lima, dating Sen. Antonio Trillanes IV, Atty. Chel Diokno, at dating Rep. Teddy Baguilat. 

Watch more News on iWantTFC

Inihayag naman ni Robredo na nais niyang kumatawan sa marginalized sector ang pipiliing ika-12 kandidato. 

Kasama sa pinagpipilian dito sina Rep. Neri Colmenares at Labor Leader na si Atty. Sonny Matula. 

Sabi ni Robredo, matagal na niyang gustong magkaroon ng slate na may mga kandidatong magkakaiba ang paniniwala at pinanggalingan. 

Naging batayan umano sa pagpili ng kandidato ang kahandaan nila na magbuklod-buklod. 

Watch more News on iWantTFC

"Matagal na natin itong pinaghihirapan, to unify as many people as possible coming from diverse backgrounds. 'Di lang sa pulitika pero paminsan kahit sa paniniwala," ani Robredo.

Dagdag pa niya: "Yung mga pinili nating guest candidates, they were among the very first who responded to our calls for unity, na kahit maraming pinagdaanan ang ating kasaysayan, hindi ko naman sila nire-regard ever na kaaway. Pero may mga hindi pagkakasundo sa mga daang tinahak before, 'yung kahandaang makipagkaisa malaking bagay na 'yun." 

Habang paulit-ulit ang mga pangalan ng mga beterano sa politika, marami naman ang nadismaya sa hindi pagkakasali ni Colmenares at ni Matula sa Senate slate ni Robredo. 

Ang PAMALAKAYA, isang grupo ng mga mangingisda, hindi maituturing na tunay na oposisyon ang ilan sa bahagi ng slate ni Robredo, na pawang kumakatawan umano sa mga trapo at kanilang mga politikal na interes. 

"Without Colmenares, Vice President Robredo’s senatorial line up is more of a representation of traditional politicians and their political interests than a representation of the marginalized. Vice President Robredo needs Atty. Colmenares more than some people in her slate that do not have any credibility to be called opposition, simply put," sinabi ng grupo. 

Kapwa bahagi ng 1Sambayan sina Colmenares at Matula na kapwa nagsabing nirerespeto nila ang desisyon ni Robredo. 

Pero ayon sa Makabayan Bloc, tuloy ang kanilang layuning makamit ang pagkakaisa ng mga tutol sa administrasyon. Wala pang ineendorsong pangulo ang grupo bagama't nasa Senate slate na ni Sen. Manny Pacquiao si Colmenares, na miyembro ng hanay. 

"Ang mahalaga po sa puntong ito, we respect the position of Vice-President Leni Robredo but we will continue to work para doon sa broad unity among non-administration candidates dahil sabi nga namin, the clear and present danger ngayon ay ang pagbabanta ng pagbabalik ng diktadura at pagtuloy-tuloy ng tiraniya sa susunod na anim na taon," ani Bayan Muna Rep. Carlos Zarate. 

Sa isang pahayag, sinabi naman ng 1Sambayan na sinusuportahan nila ang tiket nina Robredo at ng running mate nitong si Sen. Kiko Pangilinan pero maglalabas sila ng sariling listahan ng mga senatorial candidate na susuportahan. 

Ayon sa political analyst, maaaring kinonsidera ni Robredo ang winnability o tsansang manalo sa pagpili ng senatorial candidates, bukod sa inclusivity o pagsama sa nakakaraming sektor. 

"Problem is that if you're going to add more unfamiliar names, they were probably thinking about how that is going to affect results. Although they will stand out in moral and political principles, but the problem is: are they going to win?" sabi ng political analyst na si Dennis Coronacion. 

Hanggang Nobyembre 15 pa ang substitution at doon pa lang malalaman ang pinal na listahan ng mga tatakbo sa Halalan 2022. 

-- May mga ulat ni Mike Navallo, ABS-CBN News

Bisitahin ang Patrol.PH para sa iba pang mga balita.