PatrolPH

Pagbaba ng NCR sa Alert Level 3 kinuwestiyon ng doctors' group

ABS-CBN News

Posted at Oct 14 2021 12:15 PM | Updated as of Oct 14 2021 07:16 PM

MAYNILA - Iginiit ng grupo ng mga doktor na dapat maging malinaw ang mga criteria kung bakit puwede nang ibaba ang Alert Level 3 sa Metro Manila. 

Ayon kay Dr. Maricar Limpin, pangulo ng Philippine College of Physicians, hindi sapat na sabihing nakikita nang bumababa ang COVID-19 cases kung walang nakalatag na basehan ng kung ilang porsiyento ang target na makamit para magbaba ng alert level. 

Watch more on iWantTFC

"They don't even know kung ano 'yung dapat na maging basehan how much decrease in the cases, ano 'yung utilization rate ng mga ospital na gusto nilang tingnan, pag umabot ba ng ganito pwede na," ani Limpin sa interview sa TeleRadyo. 

Importante rin aniyang may nakahandang intervention ang pamahalaan sakaling makakita ng senyales ng muling pagtaas ng mga kaso ng COVID-19.

Kuwestiyonable rin para kay Limpin kung tama ang mga datos dahil hindi aniya tumutugma ang ipinapakita ng pamahalaan sa nakikita ng mga health worker sa mga ospital. 

Payo naman ni Limpin sa publiko maging maingat pa rin kahit ibaba ang alert level dahil marami pa ring hindi bakunado. 

"Huwag na ho tayong lumabas kung pupuwede lang ho, i think mas maganda hintayin natin siguro by Christmas baka mas meron tayong mas magandang pagkakataon na talagang medyo mag-enjoy na tayo pero for now mas maganda nang magtuloy-tuloy na bumaba ang kaso ng COVID-19 para maging mas masaya tayo sa Pasko," ani Limpin. 

Nitong Miyerkoles ay inanunsiyo na ibababa na sa Alert Level 3 ang Metro Manila simula Oktubre 16. 

Sa Alert Level 3, pinapayagan ang balik-operasyon ng mas maraming negosyo.

Bukod dito, papayagan nang pumasok sa mga sinehan ang mga fully vaccinated, at may 30 porsiyentong kapasidad na ang mga ito. 

Limitado lang din sa point to point travel ang paglabas ng mga batang may kasama pero bawal pa rin ang mga bata sa mga pampublikong lugar tulad ng parke at palaruan. 

Sa ilang siyudad gaya ng Quezon City, bumababa na ang bilang ng mga nagkaka-COVID-19. 

Ayon sa OCTA Research Group, bumababa nang 36 porsiyento ang average new daily cases sa siyudad sa 506 mula 793. 

Ang heath care utilization ay nasa 67 porsiyento na pero nananatiling mataas pa rin sa 70 porsiyento ang okupadong intensive care units sa mga ospital sa lungsod. 

Nasa 269 naman ang active cases sa Pasay City mula sa dating mahigit 1,000.

Ayon sa regional office ng DOH sa NCR, kita sa rehiyon ang pagbaba ng COVID-19 cases. 

"Nag-umpisa ng October, even sa last week ng September, medyo nakikita na natin ang downtrend and then ito sa October mas naging clearer ang naging pagbaba," ani DOH - NCR Director Gloria Balboa. 

Para naman sa dating kalihim ng DOH na si Esperanza Cabral, sapat nang basehan ang datos sa naging desisyon ng pandemic task force. 

"'Yan po ang nakikita natin dahil doon sa mga ini-set na condition ng IATF sa pagbababa mula alert level 4 hanggang alert level 3 na binanggit niyo na kanina 'yung daily attack rate, 'yung hospital utilization at 'yung reproduction rate eh ang sabi po nila eh naabot na po lahat ng ito," ani Cabral. 

Watch more on iWantTFC

Nilinaw naman ng Metro Manila Council, na samahan ng mga alkalde at mga tanggapan sa Metro Manila na magpapatuloy pa rin ang granular lockdowns sa pagpapatupad ng Alert Level 3 sa NCR. 

Magdodoble rin anila sila ng paghahanda. 

"Eto lang po ang masasabi namin under this Alert Level 3 inaasahan ng MMDA at ng mga mayors ng Metro Manila talagang dadami ang tao kaya ngayon pa lang may mga preparasyon na dito," ani MMDA Chairman Benhur Abalos Jr. 

Nanawagan din sila sa publiko na magpapatuloy pa rin ang paninita sa mga lalabag sa health protocols gaya ng physical distancing, pagsusuot ng face masks at face shields sa tamang lugar. 

-- May mga ulat nina Zandro Ochona at Doris Bigornia, ABS-CBN News

Bisitahin ang Patrol.PH para sa iba pang mga balita.