Hotel na pinayagang magpa-staycation ininspeksiyon ng DOT

ABS-CBN News

Posted at Oct 14 2020 02:33 PM | Updated as of Oct 14 2020 05:51 PM

Watch more in iWantTFC

MAYNILA (UPDATE) - Ininspeksiyon ngayong Miyerkoles ni Tourism Secretary Bernadette Romulo-Puyat ang isang hotel sa Taguig City para matiyak kung sumusunod ang establisimyento sa mga panuntunan sa pag-o-operate.

Ang naturang hotel kasi ang isa sa 10 hotel sa Metro Manila na nakakuha ng certificate of authority para makapag-accommodate ng mga bisita sa "staycation" o pagbabakasyon sa loob ng hotel.

Ayon kay Puyat, maraming ibang hotel ang nag-apply para payagang makapag-operate na rin matapos ang 6 na buwang bagsak ang kita bunsod ng COVID-19 pandemic.

Watch more in iWantTFC

Magugunitang noong Setyembre, inanunsiyo na pinapayagan na ang staycation sa mga lugar na nasa ilalim ng general community quarantine, kasama ang Metro Manila. 

Pero tanging mga hotel umano na may 4-star at 5-star rating ang papayagan ng Department of Tourism na magpa-staycation.

Ayon kay Puyat, makatutulong ang pagpapa-staycation para bigyan ng "sense of normalcy" ang mga tao na gustong makapag-relax nang ligtas.

Gusto rin ni Puyat na mapatakbo ang industriya ng turismo kahit paunti-unti, at bigyan ng trabaho ang mga nasa sektor.

Humanga naman si Puyat sa health protocols na ipinatupad ng hotel sa Taguig dahil mayroon itong antigen testing plan, na mismong sinubukan ng Kalihim. Lumabas ang negative result ng test niya sa loob ng 20 minuto.

Sa mga gustong mag-staycation, pinapayagan ang ano mang edad, maliban sa mga buntis o may higit sa isang medical condition, base sa mga patakarang inilabas ng DOT.

Kailangan munang mag-presenta ng guest ng resulta ng rapid antigen test na ginawa sa kaparehong araw ng check-in.

Puwede lang din umanong mag-staycation ang guests sa kaparehong probinsiyang kanilang tinitirhan.

Babantayan naman ng DOT ang mga accredited na hotel, lalo na sa pagsunod sa health at safety protocol. -- Ulat nina Michael Delizo at Arra Perez, ABS-CBN News

Bisitahin ang Patrol.PH para sa iba pang mga balita.