Gabinete inirekomendang iklian sa 4 oras ang quarantine curfew — Malacañang

ABS-CBN News

Posted at Oct 14 2020 06:04 PM | Updated as of Oct 14 2020 11:59 PM

Pinulong ni Pangulong Rodrigo Duterte ang kaniyang Gabinete noong October 12, 2020. Simeon Celi, Presidential Photo

MAYNILA — Pabor ang Gabinete ni Pangulong Rodrigo Duterte na paikliin sa 4 na oras ang curfew na pinaiiral habang may community quarantine dahil sa COVID-19, ayon sa Malacañang. 

Sa isang panayam, sinabi ni Presidential Spokesperson Harry Roque na karamihan ng local government units ay nagpapatupad ng curfew na 10 p.m. hanggang 5 a.m., pero inirerekomenda ngayon ng Gabinete na paikliin ito sa pamamagitan ng mga ordinansa. 

“Bagama’t iyong iba po kasi nagkaroon naman ng maagang curfew. So, ang desisyon po ng Gabinete, irekomenda na nga sa lahat ng mga local government units na paikliin na iyong curfew,” ani Roque. 

Watch more in iWantTFC

Nang matanong kung pabor ang Gabinete sa curfew na 12 a.m. hanggang 4 a.m., kinumpirma ni Roque na ito ang naging rekomendasyon nila. 

“Iyan po ay rekomendasyon ng Gabinete, pero siyempre po dahil magpapasa sila ng ordinansa, nasa lokal na pamahalaan po iyan,” aniya.

Pero dahil ang mga lokal na pamahalaan ang magpapatupad nito, dedepende pa rin ang curfew sa ordinansang ipapasa nila. 

Matatandaang ang pagpapaikli ng curfew hours ay isa sa mga naaprubahan ng Gabinete sa naging pulong nito noong Lunes. 

— Joyce Balancio, ABS-CBN News

Bisitahin ang Patrol.PH para sa iba pang mga balita.