PatrolPH

Milyon-milyong halaga ng pinsala naitala sa pananalasa ni Maring

ABS-CBN News

Posted at Oct 13 2021 01:35 PM | Updated as of Oct 13 2021 07:54 PM

Watch more on iWantTFC

MAYNILA— Aabot sa milyon-milyong halaga ng pinsala ang naitala sa ilang probinsiya dahil sa pananalasa ng Bagyong Maring.

Watch more on iWantTFC

Nasa P608.50 milyon ang pinsala ng Maring sa agrikultura sa Cordillera Administrative Region, Ilocos Region, Cagayan Valley, Central Luzon, Bicol Region at Western Visayas, ayon sa Department of Agriculture. Mahigit 29,000 na mga magsasaka at mangingisda ang naapektuhan. 

Sa Ilocos Norte, tinatayang aabot sa P31.6 milyon ang pinsala sa agrikultura. 

Sinabi sa TeleRadyo ni Marcell Tabue ng local disaster risk reduction and management office, anihan na sana pero maraming nasirang palayan sa lalawigan.

May mga nasira rin aniyang mga imprastraktura. 

"Dito po sa Ilocos Norte-Apayao Road may na-report po na damage sa slope protection along the road amounting to P35 million po siya. Ito 'yung initial pa lang na damage report from the DPWH so baka may madagdag pa po," ani Tabue. 

Sa Ilocos Sur, umaabot na sa P150 milyon ang halaga ng pinsala sa agrikultura, habang P432 milyon naman sa imprastraktura. 

Sa Cagayan, umaabot na sa higit P32 milyon ang halaga ng pinsala ng bagyo sa agrikultura habang higit P1 milyon naman sa livestock at P1.4 milyon sa imprastraktura. 

"Sa ngayon po ang damage estimate namin pagdating sa agrikultura meron na tayong P32.870 million, sa livestock P1.316M. Nag-compose ako ng team para bumaba sa mga hard-hit towns upang i-check kung ano po mga damage sa bagyong Maring," ani disaster risk reduction and management officer Col. Darwin Sacramed. 

Dahil dito, problemado ang ilang magsasasaka gaya ng pamilya Mercado. 

Nakabilad kasi roon ang kanilang aning mais nang rumagasa ang baha noong Oktubre 11. 

Humihiling ngayon ng tulong ang mga magsasaka para makabangon. 

Watch more on iWantTFC

Ayon naman sa provincial disaster office ng La Union, nasa P305 milyon ang pinsala sa agrikultura habang P30 milyon naman sa livestock sa buong probinsiya. 

Sa ngayon ay wala nang storm signal na nakataas dahil sa Maring, na wala na sa Philippine area of responsibility.

Ayon sa DA, maglalaan sila ng P172 milyon mula sa quick response fund para sa rehabilitasyon ng mga apektadong sakahan. Mamimigay rin ang ahensiya ng mga binhi at gulay at magpapautang sa mga nangangailangan. 

— May mga ulat nina April Rafales at Bianca Dava, ABS-CBN News, at nina Harris Julio at Grace Alba

Bisitahin ang Patrol.PH para sa iba pang mga balita.