24 pamilya nasunugan sa Commonwealth, QC; 1 sugatan

ABS-CBN News

Posted at Oct 13 2020 04:18 PM | Updated as of Oct 13 2020 11:53 PM

Sumiklab ang sunog sa isang residential area sa Kasunduan Street creekside sa Barangay Commonwealth, QC bandang alas-12 ng tanghali, Martes. Larawan mula kay Harold Joshua Singson

QUEZON CITY (UPDATE) — Isa ang sugatan, samantalang 24 pamilya ang nawalan ng tirahan dahil sa sunog na sumiklab sa isang residential area sa Kasunduan Street creekside sa Barangay Commonwealth, Quezon City ngayong Martes ng hapon.

Nagsimula ang sunog pasado alas-12 ng tanghali sa ikalawang palapag ng isang bahay na inuupahan ng residenteng si Teresita Lonzaga, ayon kay investigator Sgt. Rolando Valena ng QC Bureau of Fire Protection (BFP). 

Natutulog lang daw si Lonzaga noon sa ground floor ng kanyang bahay nang makaamoy ng nasusunog na kuryente, dagdag ni Valena. 

Kumalat ang sunog sa 12 pang bahay kung saan apektado sa kabuuan ang 24 na pamilya. Aabot naman sa P30,000 ang halaga ng mga ari-ariang natupok.

Ayon sa mga residente, abot hanggang hita ang taas ng tubig-baha sa kanilang lugar nang bumuhos ang malakas na ulan nitong Lunes. 

Kaya sabi ng BFP QC, maaring mga nabasang kable ng kuryente ang sanhi umano ng sunog. 

Paalala ng BFP sa mga residenteng may magkakadikit na bahay ngayong tag-ulan, patayin ang circuit breaker kapag bumaha sa kanilang lugar. 

Watch more in iWantTFC

Umabot sa ikalawang alarma ang sunog, ayon kay Fire Chief Inspector Joseph Del Mundo.

Alas-2:33 ng hapon nang idineklara ang fire out ng mga awtoridad.

Pansamantala namang mananatili sa covered court ng barangay ang mga nasunugan.

— Ulat nina Zyann Ambrosio at Wheng Hidalgo, ABS-CBN News

Bisitahin ang Patrol.PH para sa iba pang mga balita.