ALAMIN: Tamang paggamit ng contact tracing info ng kustomer

ABS-CBN News

Posted at Oct 13 2020 11:32 AM | Updated as of Oct 13 2020 07:31 PM

Watch more in iWantTFC

MAYNILA (UPDATE) - Kabilang sa mga kadalasang kinokolektang impormasyon sa contact tracing ang pangalan, cellphone number, e-mail, at temperatura ng mga kustomer sa isang online form o health declaration form na pinupunan nila bago pumasok sa isang establisimyento. 

Ginagamit ang nasabing impormasyon para matunton ang isang kustomer, sakaling malamang may nakasalamuha itong kapwa kustomer o trabahador ng establisimyento na may sintomas o kaya na-diagnose na mayroong coronavirus disease 2019 (COVID-19).

At kaakibat niyan, may tamang paraan ng pag-aalaga ng mga nakakalap na impormasyon, paalala ng commissioner ng National Privacy Commission nitong Martes. 

Ayon kay NPC Commissioner Raymund Liboro, may guidelines na inilabas ang mga ahensiya sa tamang pagiingat sa contact tracing information ng mga kustomer. 

"For contact tracing, sinabi ng DTI (Department of Trade and Industry), 30 days lamang ang kailangan at DOH (Department of Health) na kailangan itago ito, pagkatapos nito kailangan silang securely i-dispose itong mga datos na ito kaya walang dahilan para patagalin ang mga data na para sa contact tracing. So 30 days lamang ito. Every 30 days, 'yung kinolek na nasa logbook na 'yan, 'yun po ay kailangan niyo nang itapon dahil hindi na po 'yan kinakailangan, o sirain," ani Liboro. 

Batay sa joint memorandum circular ng DTI at Department of Labor and Employment, dapat nang itapon matapos ang 30 araw ang mga nakolektang impormasyon sa health declaration form. 

Malinaw din dapat sa mga nagfi-fill out nito kung para saan ang mga kinokolektang impormasyon at dapat ituring ito na “highly confidential.” 

May mga mali kasi aniyang paraan ng pangongolekta ng impormasyon. Kung hindi anila kasi sa nakatiwangwang na mga logbook, ipapasok lang sa kahon na papel pa parang nasa raffle ang impormasyon. 

"Tingnan nila 'yung guidelines na nilabas ng DTI at DOLE that covers their establishment. Very clear ang guidelines… Sinasabi nga doon itong mga nakokolekta dapat ibinibigay sa HR officer ng establishment," ani Liboro. 

Paalala pa niya, hindi dapat gamitin sa marketing o iba pang bagay na walang kinalaman sa contact tracing ang mga impormasyon ng mga kustomer. 

Multa o pagpapahinto ng operasyon ang posibleng harapin ng mga negosyong lalabag sa contact tracing guidelines ng gobyerno. 

Ayon kay Liboro, pinagpapaliwanag na nila ang nasa 11 establisimyentong ginamit umano sa maling paraan ang contact tracing details ng kanilang mga kustomer. 

Kasama aniya sa mga inireklamo sa kanilang tanggapan ang paggamit ng kanilang detalye para sa pag-market ng mga bagong produkto, hindi pagsabi kung para saan ang impormasyon, at ang maling pagtatago ng mga datos na nakakalap. 

"Yung isa nagreklamo sa amin pagkatapos daw niyang pumasok sa establisimyento… Kinabukasan mayroon na siyang marketing promo na nakuha at pino-promote na 'yung kumpaniya. 'Yung isa transparency issue naman, 'yung hindi pagsasabi ng specific kung para saan ginagamit ang kanilang kinokolekta. Sinasabi pa dun na itatago nila ang kanilang nakuhang datos ng dalawang taon," ani Liboro. 

Ayon kay Liboro, obligasyon aniya ng mga establisimyentong pangalagaan ang impormasyon ng kustomer. 

"Kung kinakailangan ipakita nila ang kanilang system, paano nila ipinatutupad 'yan at bibigyan na rin namin sila ng reminders ng obligasyon nila under the law," ani Liboro. -- May ulat ni Raphael Bosano, ABS-CBN News

Bisitahin ang Patrol.PH para sa iba pang mga balita.