PatrolPH

'Maring' binayo ang ilang parte ng Luzon; ilang residente namatay, nawawala

ABS-CBN News

Posted at Oct 12 2021 11:33 AM | Updated as of Oct 12 2021 08:10 PM

 

MAYNILA (3RD UPDATE) - May ilan nang mga naitalang patay o kaya ay nawawala matapos bayuhin ng bagyong Maring ang ilang parte ng Luzon at magdulot ng mga landslide at flash flood. 

Sa huling ulat ng National Disaster Risk Reduction and Management Council (NDRRMC) nitong hapon ng Martes, aabot sa 11 ang naiulat na namatay, 3 ang nasugatan, habang 7 ang nawawala pa. 

Watch more on iWantTFC

 Kabilang sa mga namatay ang ilang paslit at ang mga kamag-anak nila. 

Sa Narra, Palawan, apat ang naitalang patay sa flash flood na nangyari bandang alas-2 o alas-3 ng madaling araw. Labing-isang barangay ang apektado ng flash floods.

Ayon sa incident management team ng Narra municipal disaster office, mula sa Barangay Princess Urduja at Barangay Batang-Batang ang mga nasawi - kasama ang isang batang 5 anyos.

Watch more on iWantTFC

Aabot naman sa apat ang namatay sa Baguio at Benguet - kung saan napapabilang ang tatlong batang magkakapatid at isang matandang lalaki. 

Apat naman ang nawawala mula sa Barangay Batang-Batang, kabilang ang magulang ng nasawing bata. 

Nailikas naman ang 60 residente, habang nagpapatuloy ang search and rescue operations sa mga nawawala. 

Ang tatlong bata, namatay matapos matabunan ng landslide sa kanilang bahay sa Benguet.

"We just received a report, may tatlo natabunan. Mga bata - 2 years old, 6 years old, 8 years old," ayon kay Benguet Vice Governor Johnny Waguis. 

"Hindi natin inaasahan na mala-landslide ang bahay," dagdag niya.

Watch more on iWantTFC

Nasugatan naman ang ilan na dinala sa ospital. 

Naitala rin ang pagbaha sa La Trinidad sa Benguet. 

Watch more on iWantTFC

Sa datos ng provincial disaster office ng Cagayan, aabot sa 80 barangay mula sa 89 bayan ang nakaranas ng pagbaha, at aabot sa 13,918 ang apektadong residente. 

Mahigit P14 milyon din ang halaga ng pinsala sa mga pananim, habang nasa P353,000 naman ang pinsala sa livestock o alagang hayop, ayon sa inisyal na tala. 

Aabot din sa dalawa ang ipinapalagay na nasawi sa pananalasa ng bagyo sa Cagayan, kabilang ang isang security guard sa Claveria at isang babae sa Iguig. 

Hiwa-hiwalay ang mga COVID-19 cases sa mga evacuation center para maiwasan ang hawahan. 

Naging malakas din ang ulan at hanging dala ng bagyo sa Nueva Vizcaya, ayon sa gobernador na si Carlos Padilla, na nagsabing ngayon lang nila naranasan ang ganitong kalakas na pag-ulan. 

Sinabi ng Malacañang na nag-deploy na sila ng mga rescue personnel at naipadala na ang ilang team nang may suporta sa militar, pulis, Philippine Coast Guard at Bureau of Fire Protection.

Watch more on iWantTFC

Naitala rin ang mga pagbaha sa Ilocos provinces, maging sa La Union at nag-iwan din ng pinsala ang bagyo roon. 

Nagsimula na ring humupa ang baha sa maraming lugar kaya pinauwi na rin ang marami sa mga lumikas. 

Ayon sa weather bulletin ng state weather bureau PAGASA bandang alas-5 ng hapon ng Martes, nakalabas na sa Philippine Area of Responsibility ang 'Maring.' 

May taglay itong hangin na 100 kilometro kada oras at pagbugsong nasa 125 kilometro kada oras. 

Nakataas ang Signal No. 2 sa Batanes at Babuyan Islands habang nakataas naman ang Signal No. 1 sa Cagayan, silangang bahagi ng Isabela, maging ang ilan pang lugar sa Northern at Central Luzon. 

-- May mga ulat ni Bianca Dava, ABS-CBN News; at nina Harris Julio, Grace Alba, at Dhobie De Guzman

Kaugnay na video 

Watch more on iWantTFC
Bisitahin ang Patrol.PH para sa iba pang mga balita.