Pamimigay ng libreng commuter cash cards, umarangkada na

ABS-CBN News

Posted at Oct 09 2020 01:30 PM | Updated as of Oct 09 2020 02:01 PM

MAYNILA - Sinimulan na ngayong Biyernes ang utos na gawing libre ang mga cash card na ginagamit para sa mga pampublikong sasakyan. 

Sa EDSA busway station sa Monumento, kinakailangang mag-fill up ng valid ID na may form kung saan kukunin ang ilang personal na detalye tulad ng pangalan, contact number, birth date at kung saang istasyon nakuha ang card. 

Load lang ng card ang kailangang bilhin ng pasahero. Aabot sa 125,000 Beep cards na walang load ang ibinigay sa Monumento bus station at PITX. 

P65 ang minimum fare dahil ito ang maximum fare ng ruta ng EDSA busway mula Monumento hanggang Paranaque Integrated Terminal Exchange. 

Maaalalang naglabas ng memorandum circular ang Land Transportation Franchising and Regulatory Board kung saan inutos nila na wala dapat singil ang mga card para sa mga bus at jeep. 

Kasunod ito ng pag-ani ng batikos ng Beep, sa paniningil nila ng P180 para sa unang singil sa mga card na gagamitin sa EDSA busway. 

Sa mga nakabili naman ng card, maaari pa rin nila gamitin ito dahil may mga bus sa EDSA bus way na gumagamit lang ng Beep, at wala silang konduktor.

Pag-uusapan naman daw ng Department of Transportation kung paano ang gagawing refund sa mga bumili ng beep card na may card fee. 

— Ulat ni Jacque Manabat, ABS-CBN News 

Bisitahin ang Patrol.PH para sa iba pang mga balita.