Mga estudyante namahagi ng school kits sa mga katutubong Agta sa Cagayan

Anjo Bagaoisan, ABS-CBN News

Posted at Oct 08 2020 04:59 AM

MAYNILA - Sabay ng muling pagbubukas ng klase, inakyat ng ilang college student sa Cagayan ang burol sa bayan ng Sanchez Mira para mamahagi ng mga school kit sa mga batang katutubo. 

Limampung mag-aaral na Agta sa Bgy. Santiago na mula kinder hanggang Grade 6 ang tumanggap ng mga kit na hatid ng mga miyembro ng Alliance of Communication Students ng Cagayan State University o CSU-ACTions bilang bahagi ng kanilang outreach program. 

Bawat school kit ay naglalaman ng pencil, ballpen, crayons, pad paper, bond paper at colored paper. 

Para marating ang Bgy. Santiago, 30 minutong sumakay at 1 oras naglakad ang mga college student. 

Isinabay na rin nila ang pamimigay ng face masks, face shields at damit sa 140 kabahayan doon. 

Ayon kay Ronald Badiang, bise-presidente ng organisasyon, una nilang plinanong mamigay ng mga face mask dahil walang magamit ang mga residente kapag lalabas sila o pupunta sa bayan. 

Minsan nang hiningan ng face masks si Badiang nang dumayo sila ng kapatid para mag-jogging. 

Dahil hindi sumapat ang dala nilang mga protective gear, nangangalap ng suporta ang grupo para makabili ng ipamimigay nila ulit. 

Plano rin nilang gawing taunan ang pamamahagi ng school kit. 

Pawang mga written modules na kadalasan sinasalin pa sa katutubong wika ang gagamitin ng mga taga-burol para sa distance learning ngayong pasukan. 

Kagaya sa ibang liblib na pook sa Sanchez Mira, hinahatid pa ng mga guro ang gagamiting module ng mga mag-aaral.