Mag-asawang 4 na buwang stranded sa Luzon, natulungang makauwi

Anjo Bagaoisan, ABS-CBN News

Posted at Oct 08 2020 06:56 AM

MAYNILA - Pauwi na sa Mindanao sina James at Sarah Fernandez, ang mag-asawang na-stranded sa Luzon mula Hunyo sa paghahanap ng biyahe pa-probinsya. 

Sa nakalipas na buwan, nagsilbing parking boy sa labas ng fast food chain sa Parañaque ang dating billiard player na si James para may mapang kain at maipon para sa pamasahe. 

Sa karton naman sila natulog sa labas ng isang gusali sa Pasay tuwing gabi. 

Ikinuwento ng mag-asawa na pareho na rin silang napapagod at nag-iinda ng karamdaman--sakit sa puso kay James at UTI kay Sarah. 

Matapos lumabas ang kuwento nila sa ABS-CBN TeleRadyo noong Biyernes, inaksyunan ang hiling nila ng lokal na pamahalaan ng Parañaque kahapon/Miyerkules. 

Sa tulong ng programang "Lingkod Kapamilya" sa TeleRadyo, sinabi ni Parañaque City administrator Ding Soriano na sasagutin ni Mayor Edwin Olivarez ang pamasahe ng mag-asawa. 

Noong parehong araw, personal na pinuntahan ni Soriano sina James at Sarah sa fast food chain kasama ang hepe ng presinto at isang barangay social worker para mag-abot ng P30,000 na pamasahe at dagdag gastos. 

Agad ding sumailalim sa rapid test ang mag-asawa para maisyuhan ng travel authority. 

Sa huling panayam kay Sarah kahapon, nasa terminal sila ng bus papuntang Batangas Port para sumakay ng ro-ro. 

Laking pasasalamat ng mag-asawa sa mga nagpakita ng kabutihang loob sa kanila. 

Kabilang na diyan ang ilang tagasubaybay ng TeleRadyo at ABS-CBN online na nagpaabot ng pinansyal na tulong sa kanila matapos makita ang kanilang kuwento. Hindi raw nila ito malilimutan.

Bisitahin ang Patrol.PH para sa iba pang mga balita.